Shtabi Emergjent në Podujevë kërkon zbatim të masave mbrojtëse kundër COVID-19

Shtabi Emergjent i Komunës së Podujevës për veprime dhe masa parandaluese e mbrojtëse nga Covid-19 ka mbajtur takim, në të cilin ka shqyrtuar gjendjen aktuale me pandeminë, respektimin e masave mbrojtëse nga ky virus.

Në takimin e sotëm të Shtabit Emergjent, të udhëhequr nga nënkryetarja e Komunës, Marigona Lahu, u diskutua për situatën e përgjithshme epidemiologjike në Komunën e Podujevës, pas shtimit të rasteve me të infektuar gjatë ditëve të fundit.

Në takimin e sotëm u tha se është shqetësuese rritja e rasteve me të infektuar gjatë ditëve të fundit.

Epidemiologia Bedrie Rama tha se gjatë dy ditëve të fundit janë regjistruar 72 raste të reja me COVID-19 në Komunën e Podujevës. Ndërsa, aktualisht janë gjithsej 211 raste aktive, kurse që nga fillimi i pandemisë janë regjistruar 3,238 raste me virus, prej tyre 46 persona nuk i kanë mbijetuar këtij virusi.

Epidemiologia Rama tha se ditëve të fundit ka rritje të rasteve që kërkojnë ndihmë në Qendrën për trajtimin e pacientëve me COVID-19 në QKMF, kurse tek personat e infektuar vërehen simptoma më agresive të virusit.

Në këtë qendër janë duke punuar katër ekipe dhe se situata është nën kontroll, përfundoi epidemiologia Rama.

Edhe drejtori i Drejtorisë së Shëndetësisë, Driton Veliu, shprehu shqetësimin për rritjen e numrit të rasteve me COVID-19 dhe kërkoi angazhimin e të gjithëve në respektimin e masave mbrojtëse.

Togerja Valbona Blakçori – shefe e sektorit të Operativës në Stacionin Policor në Podujevë, tha se policia është duke zbatuar planin operativ për zbatimin e masave mbrojtëse kundër COVID-19.  Ajo tha se kanë ashpërsuar masat ndaj qytetarëve dhe bizneseve për mos respektim të masave. Togerja Blakçori tha se në 11 ditët e para të këtij muaji kanë shqiptuar 215 gjoba për mos respektim të masave mbrojtëse.

Gjatë takimit u tha se në përgjithësi nuk janë duke u respektuar masat mbrojtëse sipas rekomandimeve të IKSHPK dhe Ministrisë së Shëndetësisë dhe si pasojë e kësaj ka rritje të numrit të infektuarve.

Edhe kryetari i Këshillit të Bashkësisë Islame, Mensur Hoti, tha se masat mbrojtëse nuk janë duke u respektuar gjatë faljes së namazit nëpër xhami dhe se po organizohen ceremoni varrimesh dhe pritje në të pame.

Drejtori i Drejtorisë së Inspeksionit, Ajet Potera, tha se masat anti-Covid nuk po respektohen nga pronarët e  restoranteve, transportuesit publikë dhe marketet.

Nënkryetarja Lahu kërkoi angazhim të të gjitha organeve kompetente, veçmas policia dhe inspektorati të jenë më aktivë në teren, në mënyrë që të zbatohen rekomandimet dhe respektohen masat mbrojtëse.

Në këtë aspekt u rekomandua që të organizohet një takim me pronarët e objekteve të gastronomisë-hotelerisë, transportuesve publikë dhe biznese të tjera dhe të paralajmërohen për masat më rigoroze që do të ndërmerren për ata që nuk respektojnë masat mbrojtëse.