Reagon Lëvizja Vetëvendosje në Podujevë lidhur me ngjarjet e sotme në Kuvend

Kryetari i Komunës së Podujevës, Shpejtim Bulliqi, është përplasur ashpër me asambleistin e Lidhjes Demokratike të Kosovës, Ekrem Rrahmanin. Shkaku i përplasjes së tyre, është ndërprerë edhe seanca e Kuvendit Komunal.

Rrahmani i është drejtuar disa herë Bulliqit, duke e quajtur tradhtar.

“Na jena mësu me ksi tradhtar, se ti ke pri. Je tradhtar ti, taj ky e rend qështu. Ti kurrë s’ndale tradhti këtu”, ka thënë Rrahmani.

Bulliqi në replikën e tij, ka përmendur edhe ish-presidentin Hashim Thaçi dhe ish-Kryetarin e Podujevës, Agim Veliun.

“Ti krejt kohën ke hongër në grazhd të Hashim Thaçit edhe kurrë tradhtar s’të kom thanë, deri tash. Edhe hala je tu hongër. Unë me Hashimin s’kom pas kurgjë, kurrë se kam tradhëtu sa jam kanë aty…Ti s’e di as çka është tradhtari…Deri dje ke ba Agim Veliu, e sot po e shan Agim Veliun. Ti je tradhtar se unë s’po e shaj”, ka thënë Bulliqi.

Asambleisti i LDK’së i është drejtuar sërish Bulliqit, duke e quajtur tradhtar dhe uzurpator.

“Ti je tradhtar, je uzurpator, tonat i ki”, ka thënë Rrahmani.

E për këtë ka reaguar edhe Lëvizja Vetëvendosje në Podujevë përmes një reagimi ku thuhet:

Asamblisti i LDK-së, Ekrem Rrahmani, tenton ta sulmojë kryetarin e Komunës, Shpejtim Bulliqi

Këshilltari komunal i LDK-së, Ekrem Rrahmani, asesi nuk po mund të edukohet. Ai në seancën e sotme të Kuvendit Komunal tentoi edhe ta sulmojë fizikisht kryetarin e Komunës, z.Shpejtim Bulliqi. Asamblistët e kësaj partie e veçmas Ekrem Rrahmani, pothuajse në secilën seancë të Kuvendit vazhdon me fyerje e sjelllje prej rrugaçësh si ndaj këshilltarëve të partisë tonë, po ashtu edhe ndaj kryesuesit të Kuvendit. Ndërsa, sot shkoi përtej kësaj duke tentuar edhe ta sulmojë fizikisht Kryetarin Bulliqi.

E gjitha ndodhi pas një debati të gjatë e pa asnjë argument rreth kërkesës së LDK-së për zëvendësimin e anëtarit të Komitetit për Komunitete, Demokrat Hodolli. Këshilltari Hodollli kohë më parë e ka deklaruar daljen nga Grupi i LDK-së, po nuk ka hequr dorë edhe nga partia e tij. Duke qenë kështu, ai ka vazdhuar të jetë anëtar i Komitetit për Komunitete. Por, kërkesa shumë meskine e LDK-së ishte që Hodolli të zëvendësohet me një anëtar tjetër të tyre, gjë që edhe u hodh në votim nga kryesuesi, por që nuk i mori votat e mjaftueshme.

Meqenëse dështoi propozimi i tyre, Kryetari Bulliqi për t’i dhënë zgjidhje kësaj kërkese, propozoi që për këtë çështje të kërkojnë përgjigje nga MAPL-ja se si të veprojnë rreth anëtarit të Komitetit për Komunitete. As kjo nuk u mjaftoi dhe Ekrem Rrahmani, eskaloi në fyerje ndaj Kryetarit dhe këshilltarët e LDK-së e penguan edhe rrjedhën e seancës. Ndërkohë, Ekrem Rrahmani shkoi në foltore për ta sulmuar Kryetarin Bulliqi.

Sjellja e asamblistëve të LDK-së, e veçmas e Ekrem Rrahmanit, përveçqë është e papranueshme, tejkalon çdo sjellje njerëzore. Siç është parë përgjatë këtyre tre vjetve të këtij mandati, ai të vetmin “argument” e ka arrogancën, fyerjen e sjelljen prej një rrugaçi të papërmirësueshëm. Përfaqësues të tillë, nuk i bëjnë nder jo vetëm Kuvendit Komunal, por as partisë që e përfaqëson.

Në Polici rastin e ka paraqitur Kryetari Bulliqi për tentim sulm fizik ndaj tij dhe presim tash që organet e rendit të ndërmarrin hapat e nevojshëm bazuar në legjislacionin në fuqi.