Raporti i AKP-së, politikanët privatizuan tokë për vetëm 3.50 euro arin

Vetëm 3 euro e gjysmë për një ari tokë kishte paguar Ramush Haradinaj në procesin e privatizimit, në mars të vitit 2010, përmes metodës spin-off.

Në total, ish-kryeministri i Kosovës dhe lideri i AAK-së kishte paguar 70 mijë euro për 198 hektarë tokë bujqësore, me një plantacion të vishnjave dhe lajthive, në fshatin Isniq të Deçanit.

Në raportin e menaxhmentit të Agjencisë së Privatizimit, për vitin 2020, i cili i ishte dorëzuar bordit të drejtorëve, e të cilin e ka siguruar ATV-ja, thuhet se Prodhimtaria Bimore “Irzniq”, është shitur si ndërmarrje e re.

Nga privatizimi ka përfituar edhe vëllai i Rexhep Selimit, Ilaz Selimi. Në vitin 2006, ai kishte blerë fabrikën “Speed” në Klinë, ndërsa në gusht të 2009-s privatizoi një tokë bujqësore në Klinë, për vetëm 5.26 centë arin.

Ndërkohë, nënkryetari i OVL-UÇK-së, Nasim Haradinaj, në fshatin Rakoc është bërë pronar i një toke bujqësore, për të cilin kishte paguar për një ari vetëm 17.7 euro. Përmes metodës spin-off, në shtator të 2009-s, Haradinaj ka marrë në pronësi tokë edhe nga ndërmarrja shoqërore “KBI bujqësia” në fshatin Kosuriq të Pejës.

Sipas këtij raporti, kompania e Ramiz Kelmendit, “ELKOS”, ka blerë tokë në fshatin Drelaj të Rugovës, për vetëm 16 euro e 38 centë arin. Të gjitha shitjet ishin aprovuar nga bordi i drejtorëve të AKP-së.

“ELKOS” nuk është ndalur me kaq, pasi ka marrë në pronësi edhe toka të tjera bujqësore në Pejë, në fshatin Zahaq, për vetëm 18.42 euro arin, me një sipërfaqe prej 597 hektarë.

Në vitin 2005, kompania e Kelmendit ka blerë toka edhe në Mitrovicë, në Prizren, në Ferizaj e në Prishtinë.

Me një çmim prej vetëm 7 euro e 9 centë për ari, “Vëllezërit Geci” në vitin 2009, përmes metodës spin off, kanë blerë tokë bujqësore në Turiqevc të Skenderajt.

Gjithashtu, kompania e vëllezërve të Gani Gecit, përmes privatizimit, ka blerë toka edhe në Mitrovicë e Klinë.

Ish-deputeti i AKR-së, Islam Pacolli, i ka blerë tri shëtitoret në Blinajë të Lipjanit, në prill të 2017-s, për vetëm 280 euro gjithsej.

Kuvendi i Kosovës, të enjten, ka shkarkuar bordin e AKP-së.

Opozita e ka kritikuar këtë veprim, por kryeministri Albin Kurti tha se ky është hap drejt ndaljes së tjetërsimit dhe zhvatjes.

Vetëvendosja ka premtuar shuarjen e AKP-së dhe themelimin e Fondit Sovran./ATVLIVE