Postoi foto me armë në rrjetet sociale – Policia bastis shtëpinë e 30-vjeçarit në Podujevë, ia konfiskon armën

Posedimi i armëve ilegale është një dukuri shqetësuese në vendin tonë, pasi që Policia vazhdimisht has në persona të armatosur të cilët cenojnë sigurinë e qytetarëve dhe rrezikojnë jetën e tyre. Ata shpesh kapen në flagrancë me armët, me të cilat sillen lirshëm, raporton Gazeta Sinjali.

Një rast i posedimit të paautorizuar të armës është zbuluar së fundmi në Podujevë, pas një publikimi të dyshimtë në rrjete sociale.

Burimet e Sinjalit kanë bërë me dije se një person rreth moshës 30-vjeçare, më 1 janar 2025 kishte postuar një fotografi në rrjete sociale duke mbajtur një armë zjarri.

Pas veprimeve hetimore, sot rreth orës 19:00, njësitë policore kanë realizuar një bastisje në fshatin Llaushë të Podujevës, në shtëpinë e tij.

Gjatë kontrollit është gjetur dhe konfiskuar një armë zjarri – pistoletë e llojit Zoraki me gas, bashkë me një karikator.

Me vendiim të Prokurorit, ndaj të dyshuarit është iniciuar rasti për veprën penale “Mbajtja në pronësi, kontroll ose posedim i paautorizuar i armëve”.

Hetimet në lidhje me këtë rast janë duke vazhduar.