Aksidentohet kamioni në Penuhë të Podujevës, ngarkesa përfundon në rrugë
Policia jep detaje për sulmin ndaj Sokol Zogajt
Derisa Shefi i Shërbimit Korrektues po trajtohet në QKUK, Policia e Kosovës është fokusuar në identifikimin e personave të maskuar të cilët goditën rëndë atë në kokë mëngjesin e sotëm.
Sipas raportit zyrtar të policisë lidhur me këtë rast, pas ekzaminimit të vendit të ngjarjes, policia është duke hetuar personat dhe motivin që cuan ata drejt sulmit ndaj Zogajt.
“Sot rreth orës 07:00, policia ka marrë informacionin se në lagjen Ulpiana në Prishtinë, një person është sulmuar (dyshohet me mjete të forta – shufra), nga persona të dyshuar. Bëhet fjalë për viktimën S.Z mashkull, shtetas i Republikës së Kosovës, i cili ka pësuar lëndime trupore dhe i njëjti është dërguar për tretman mjekësor, në Qendrën Klinike Universitare të Kosovës, (QKUK)” .
Sipas policisë, pas ekzaminimit të vendit të ngjarjes si dhe përfundimit të procedurave fillestare nga ana e policisë, puna hetimore e policisë është fokusuar në identifikimin e personave të dyshuar me qëllim kapjen e tyre, si dhe zbardhjen e të gjitha rrethanave që kanë të bëjnë me këtë ngjarje.
“Ndërkohë që në stacionin policor Jugu në Prishtinë, në konsultim me Prokurorin e shtetit, janë iniciuar rastet, sulm ndaj personit zyrtar dhe lëndim trupor” Sipas mjekëve gjendja e tij është stabile dhe jashtë rrezikut për jetë.
Shpend Fazliu zëdhënës i QKUK-së ka thënë se Zogaj mëngjesin e sotëm ka kërkuar ndihmën e mjekëve pas lëndimeve që ka marrë.
“Mund ta konfirmoj se ai ka kërkuar ndihmë pas plagëve të marra në kokë. Është jashtë rrezikut për jetë dhe gjendja e tij aktuale është stabile”, ka thënë Fazliu për Express.
Sipas tij tash mbetet që pacientit t’i bëhen ekzaminime shtesë për të parë nëse ka lëndime më të thella.
Ky rast është konfirmuar nga Ministria e Drejtësisë.
“Sot, rreth orës 07:00 të mëngjesit duke dalë nga banesa e tij në Prishtinë, nga persona deri më tash të panjohur është sulmuar brutalisht Ushtruesi i Detyrës së Drejtorit të Përgjithshëm të Shërbimit Korrektues të Kosovës, z. Sokol Zogaj”, thuhet në njoftimin e Ministrisë e cila e ka dënuar ashpër sulmin brutal ndaj z. Zogaj, dhe i ka ftuar organet kompetente ta trajtojnë rastin, në mënyrë që kryerësit e këtij akti brutal të dalin para organeve të drejtësisë.
“Ministria e Drejtësisë do të bashkëpunoj me organet kompetente deri në zbardhjen e plotë të sulmit brutal ndaj z. Zogaj.
