PODUJEVË: Tregu i zbrazët – mallrat ekspozohen në rrugë e trotuare

Tregu i Gjelbër në Podujevë, i cili i ka kushtuar Komunës afro 50 mijë euro, vazhdon të mos shfrytëzohet nga tregtarët edhe pas më shumë se tre vjetësh prejse është ndërtuar. Tregtarët edhe më tutje vazhdojnë ta ekspozojnë mallin e tyre nëpër rrugë e trotuare, ndërsa Tregun po e shfrytëzojnë në vend të parkingut. Qeveria e re komunale thotë se fillimisht aty duhet të bëhen investime, të cilat i ka lënë të papërfunduara pushteti i kaluar

Podujevë, 25 janar – I zbrazët vazhdon të jetë Tregu i Gjelbër i Podujevës edhe tre vjet prejse është promovuar si projekt i kryer. Të rralla kanë qenë rastet kur në shtandet e tij janë vendosur pemë e perime. Tregtarët vazhdojnë ta ekspozojnë mallin e tyre nëpër rrugë e trotuare, ndërkohë që Tregun e Gjelbër disa prej tyre po e shfrytëzojnë si parking për vetura.

Ata nuk kanë pranuar të deklarohen para kamerës, por kanë thënë se Tregu nuk ka përfunduar dhe se njëra prej arsyeve pse nuk vendosen aty është edhe mungesa e WC-ve publike.

KOHA ka provuar të kontaktojë me ish-drejtorin e Shërbimeve Publike, Faik Muçiqi, por ai ka qenë i paqasshëm gjatë ditës së hënë.

Ndërkohë, nënkryetarja e Komunës së Podujevës, Marigona Lahu, thotë se në këtë treg mungon infrastruktura bazë për operimin e tregtarëve.

“Tregu i Gjelbër është përfunduar realisht në vitin 2017 dhe është përuruar në fushatën zgjedhore të vitit 2017, konkretisht në zgjedhjet lokale të atij viti. Fatkeqësisht edhe pas më shumë se 3 vjetëve ai treg ka mbetur jofunksional. Mungon infrastruktura bazë për operimin e tregtarëve”, ka thënë Marigona Lahu.

Nënkryetarja e Komunës thotë se fillimisht do të shohin gjendjen e këtij tregu dhe pastaj do të ndërmarrin hapat e tjerë për përmirësimin e gjendjes aty dhe për vendosjen e tregtarëve.

“Sigurisht që pamja e tregtarëve duke shitur në rrugë nuk është e mirë, për shkak se tregtarët duhet ta kenë një vend meritor ku do t’i shesin produktet e tyre. Ne si qeveri fillimisht do të bëjmë skenimin e gjendjes aktuale në Tregun e Gjelbër, pastaj në bazë të vlerësimit që do ta marrim nga ai skenim i gjendjes ne do të shkojmë edhe me investime të cilat duhet realisht që të ndodhin për funksionalizimin e tij”, ka thënë nënkryetarja Lahu. “Për funksionalizimin e këtij tregu ne do të mundohemi që të shikojmë procesin e menaxhimit, realisht zgjedhjen e njerëzve të cilët do ta menaxhojnë”.

Ndërtimi i Tregut të Gjelbër ka përfunduar në vitin 2017 dhe ka kushtuar afro 50 mijë euro, 10 mijë prej të cilave i ka investuar Instituti Riinvest.