Podujevë: I akuzuari për dhunë fizike ndaj bashkëshortes pranon fajësinë

I akuzuari për dhunë fizike ndaj bashkëshortes së tij, F.S. është deklaruar fajtor në seancën fillestare të mbajtur të mërkurën, në Gjykatën Themelore të Prishtinës, dega në Podujevë, raporton Betimipërdrejtësi.

“E pranoj fajësinë për veprën penale për të cilën akuzohem. Premtoj se nuk do të përsëritet vepra penale”, deklaroi i akuzuari F.S.

Ky pranim nuk u kundërshtua nga prokurorja Mimoza Shala, i cili me aktvendim u aprovua nga gjykatësi Gazmend Bahtiri, raporton “Betimi për Drejtësi”.

Se ky pranim fajësie është bërë me vullnet dhe dëshirë të plotë, deklaroi avokati Xhevat Rama, i caktuar si mbrojtës sipas detyrës zyrtare për të akuzuarin në fjalë.

Ai i ka kërkuar gjykatës që ndaj të mbrojturit të tij të shqiptoj dënim sa më të butë, për shkak se sipas tij,  i njëjti është mbajtës i vetëm i familjes dhe se ka gjendje të vështirë ekonomike.

Bashkëshortja e të akuzuarit – e dëmtuara L.S nuk ka kërkuar kompensim dëmi.

Shpallja e aktgjykimit do të bëhet më 8 korrik 2021, në ora 09:00.

Sipas aktakuzës së ngritur më 22 qershor 2021 nga Prokuroria Themelore e Prishtinës, F.S po akuzohet se më 8 qershor 2021, rreth orës 01:00, në fshatin Bellopojë, Podujevë”, konkretisht në  shtëpinë e tyre familjare, për shkak të mosmarrëveshjeve me të dëmtuarën-bashkëshorten e tij L.S, ka ushtruar dhunë fizike ndaj saj.

Siç thuhet në aktakuzë, i pandehuri kishte filluar ta qortoj dhe kritikoj se kinse e dëmtuara nuk po e mbanë pastër shtëpinë, e më pas e ka sulmuar fizikisht, duke e goditur me grusht në pjesë të ndryshme të trupit dhe përplasur herë për muri e herë për krevati.

Gjithnjë sipas aktakuzës, e dëmtuara kishte arritur të ik nga i pandehuri dhe kishte dalë në oborr të shtëpisë, mirëpo i njëjti kishte shkuar pas saj dhe sërish e kishte goditur me grusht, ku nga dhimbja e dëmtuara kishte bërtitur dhe nga britma e saj, fëmijët e tyre të vegjël janë zgjuar nga gjumi të shqetësuar, e pastaj i pandehuri e ka futur në shtëpi, duke ia mbyllur derën me dry.

Për këtë, ai akuzohet ka kryer veprën penale “Lëndim i lehtë trupor” nga neni 185 paragrafi 3 nën paragrafi 3.1 të KPRK-së.