PODUJEVË: Fjala përfundimtare e palëve për rastin e kërrcënimit të një zyrtari policor gjatë realizimit të një urdhërese të gjykatës

Në Gjykatën Themelore në Prishtinë, dega Podujevë, u tha fjala përfundimtare e palëve, për rastin ku akuzohen H. A. dhe J. A., për veprën penale “kanosja”.

Prokurorja Mimoza Shala, mes tjerash deklaroi se është vërtetuar se i akuzuari J. A. e ka kryer veprën penale për të cilën akuzohet, raporton “Betimi për Drejtësi”.

“Edhe pse vetëm njëri nga të pandehurit, H. A., e ka pranuar fajësinë për veprën penale, andaj konsideroj se me veprimet e të pandehurit J. A. manifestohen elementet e veprës penale. Pas adiministrimit të provave materiale dhe personale gjatë shqyrtimit gjyqësor është provuar dyshimi i bazuar mirë dhe është vërtetuar në tërësi gjendja faktike ashtu siç përshkruhet në dispozitivin e aktakuzës. Gjendja faktike u vërtetua nga deklarata e dëshmitarit dhe të dëmtuarit, tashmë të ndjerit Hakif Hodolli, i cili pranë prokurorit të shtetit ka deklaruar se gjatë zbatimit të urdhëresës ka hasur në vështirësi dhe rezistencë nga ana e familjarëve, por edhe nga vet i akuzuari H. A., i cili fillimisht kishte tentuar të arratisej, për çka ka qenë e nevojshme intervenimi i zyrtarëve policor”, tha prokurorja Shala.

Ajo tha se zyrtari policorë ka qenë i njohur për familjën A. edhe më parë.

“Ky zyrtar policor ka qenë i njohur për familjen A, pasi që edhe më parë ka shkuar për të zbatuar urdhëresat dhe të njejtit i janë drejtuar me fjalët “vetëm sa ta desh uniformën se ke me pas punë me mu, e shihni ju kur të dal prej burgu se kam me ju vra të gjithëve”, ndërsa J. A. e ka kanosur seriozisht me fjalët “kam me ju vra të gjithëve se ti po na arreston qe disa herë”. Edhe dëshmitari F. K. pranë kësaj gjykate në vazhdimësi e ka theksuar emrin e të pandehurit J, si dhe me sa më kujtohet, J. i ka thënë zyrtarit policor, të ndjerit Hodolli se “ty të njoh dhe do të të hakmerrem për këtë rast”. Andaj, konsideroj se me të gjitha këto prova vërtetohet se i akuzuari J. A. e ka kryer veprën penale për të cilën akuzohet. Prezenca e tij gjatë zbatimit të urdhëresës është e pakontestueshme dhe deklarimi i tij se nuk e ka kërcënuar zyrtarin policor, është e pabazuar dhe tendencë për t’i ikë përgjegjësisë penale”, vazhdoj mes tjerash fjala përfundimtare e prokurores Shala.

Se nuk e pranon fajin për këtë vepër penale dhe kërkon nga gjykata të lirohet nga kjo aktakuzë, tha i pandehuri J. A., duke shprehur se ndjehet i pafajshëm.

Meqë, lidhur me këtë rast penal, përfundoi në tërësi procedura, gjykatësi i çështjes Gazmend Bahtiri, njoftoi se shpallja e aktgjykimit do të bëhet të hënën me datën 22.02.2021, ora 14:00.

Ndryshe, sipas aktakuzës së datës 27.11.2019, H. dhe J. A. akuzohen se me datën 20.09.2019, rreth orës 09:30, në fshatin Peran të Komunës së Podujevës, të pandehurit e kanë kanosur seriozisht personin zyrtarë Hakif Hodolli, i cili së bashku me polic të tjerë kishin shkuar për të zbatuar urdhëresën e gjykatës për arrestimin e H. A., në atë mënyrë që i pandehuri H. A., të dëmtuarin – zyrtarin policor Hakif Hodolli e ka kanosur seriozisht me fjalët “veç sa te desh uniformën se ke me pas punë me mue, e shihni kur të dal prej burgu do të ju vras të gjithve”, ndërsa i pandehuri J. A., të dëmtuarin – zyrtarin policor Hakif Hodolli e ka kanosur seriozisht me fjalët “kam me ju vra të gjithëve se ti po na arreston qe disa herë”.

Me këtë ata akuzohen se kanë kryer veprën penale “kanosja” nga neni 181 paragrafi 3 lidhur me paragrafin 2 të KPRK-së. /BetimipërDrejtësi