Podujeva synon të rregullojë këshillat e fshatrave dhe lagjeve, opozita e kritikon për vonesë të qëllimshme

Përfaqësues të shoqërisë civile dhe të partisë opozitare Vetëvendosje në Podujevë po e kritikojnë ekzekutivin e kësaj komune për mosmiratimin e një rregulloreje, që ka të bëjë me organizimin e këshillave të fshatrave dhe lagjeve të qytetit.

Ata po e akuzojnë LDK-në se qëllimisht për dy vjet po e vonon miratimin e këtij dokumenti për t’i mbajtur në pozitat e kryetarëve njerëzit e tyre partiakë, raporton KOHA.

Përfaqësuesi i rrjetit të OJQ-ve “Demokracia Fillon Këtu”, Shemsi Jashari, ka thënë se aktualisht kryetarët e këshillave janë të emëruar dhe jo të zgjedhur në mënyrë demokratike.

“Momentalisht përfaqësuesit e lagjeve dhe të fshatrave i kemi anëtarë të LDK-së, e cila edhe e ka pushtetin e Podujevës. Udhëzimi i ri administrativ e përcakton qartë që personat e ekspozuar politikisht nuk mund të jenë drejtues të këtyre këshillave dhe fillimisht duhet të jenë apolitikë, ta kenë një bartës në kryesi të ngushtë të lagjes, që bashkërisht të marrin vendime dhe kjo ka bërë që komuna të menaxhojë më lehtë me përfaqësuesit e vet politikë nëpër fshatra dhe lagje sesa të emërojë dikë që është i pavarur politikisht”, tha ai.

Ndërkohë, kryetari i qendrës së Vetëvendosjes në Podujevë, Bajram Ajeti, thotë se nuk duhet që për 12 vjet të vazhdohet me njerëz partiakë në këto pozita.

“Unë mendoj që kjo bëhet me qëllim, sepse këtu shpeshherë po ka zgjedhje, kështu që ata njerëz shfrytëzohen vetëm për zgjedhje dhe fatkeqësisht edhe për interesa të tyre personale apo të ngushta dhe kështu që qytetarët nuk janë në gjendje që përmes një demokracie të drejtpërdrejtë të zgjidhet një qytetar i cili nuk guxon të ketë përkatësi politike”, tha Ajeti.

Drejtori i Administratës në Komunën e Podujevës, Gëzim Namani, i ka mohuar akuzat.

Sipas tij, pas përfundimit të dëgjimit publik të kësaj rregulloreje, kanë marrë informatë për përgatitjen e një udhëzimi të ri administrativ nga niveli qendror për këtë çështje, që kishte ndodhur rreth 1 vit më vonë.

“Jo, them se janë vetëm supozime të opozitës dhe shoqërisë civile. Ne si parti në pushtet nuk kemi asnjë tendencë që t’i mbajmë ato pretendime apo supozime që ata i kanë. Por, siç e dini situata dhe pandemia na e kanë zvarrit këtë, do të thotë me procedimin e kësaj rregulloreje. Sidoqoftë, ne jemi të gatshëm që për seancën e radhës, e cila do të mbahet në fillim të muajit shtator të procedojmë me dokumentacionin e nevojshëm dhe të shkojmë para këshilltarëve komunalë dhe ata të votojnë”, tha Namani.

Kjo rregullore ishte hedhur në diskutim publik në muajin korrik 2018 dhe do të duhej që në seancën e radhës të vihej në votim. Por, kjo nuk ka ndodhur ende.