Podujeva shënon 26-vjetorin e çlirimit me aktivitete kulturore, sportive dhe përkujtimore

Nën patronatin e Kryetarit të Komunës së Podujevës, Shpejtim Bulliqi, dhe në bashkëpunim me shoqatat e dala nga lufta e UÇK-së, Komuna e Podujevës ka përgatitur një varg aktivitetesh për shënimin e 26-vjetorit të çlirimit të qytetit, njofton PodujevaPRESS.net

Agjenda e manifestimeve për këtë përvjetor përfshin aktivitete të ndryshme artistike, sportive dhe përkujtimore, të cilat zhvillohen përgjatë tri ditëve, nga data 17 deri më 19 qershor.

Më 17 qershor, manifestimet nisin me hapjen e një ekspozite në Galerinë e Arteve nga artisti Gent Hamiti, me fillim nga ora 17:00.

Të nesërmen, më 18 qershor, në ora 13:00 do të zhvillohet një ndeshje miqësore në volejboll ndërmjet klubit vendor KV Llapi dhe KV Bujanovci.

Aktivitetet kulmojnë më 19 qershor, me agjendë të ngjeshur që nis në ora 09:00 me vendosjen e gurthemelit për ndërtimin e një pishine gjysmë-olimpike në Podujevë. Në ora 10:00 do të mbahen homazhe në Kompleksin Memorial të Dëshmorëve në Penuhë, ndërsa në ora 13:00 do të organizohet një lëvizje me biçikleta me pjesëmarrje të hapur për qytetarët.

Në ora 16:00 mbahet seanca solemne e Kuvendit Komunal, ku gjithashtu do të nënshkruhet marrëveshja e binjakëzimit ndërmjet Komunës së Podujevës dhe qytetit Aimes nga shteti Iowa i Shteteve të Bashkuara të Amerikës.

Në vijim, në ora 17:30, në Stadiumin e Llapit do të luhet një ndeshje miqësore në futboll ndërmjet veteranëve të Llapit dhe veteranëve të përfaqësueses së Kosovës.

Në mbrëmje, me fillim nga ora 19:00, do të mbahet koncert festiv në sheshin e qytetit, ku do të marrin pjesë emra të njohur të muzikës shqipe si Ilir Shaqiri, Enkelejda Arifi, Kastriot Tusha, Selami Kolonja, Nikollë Nikprelaj, Hysni Alushi, si dhe Shoqëria Kulturore Artistike “Zahir Pajaziti” dhe DJ Felix.

Në përmbyllje të manifestimeve, në ora 19:30 do të bëhet zbulimi i shkronjave monumentale të UÇK-së në fshatin Shtedim, në nderim të luftës çlirimtare dhe sakrificës së dëshmorëve.

Këto aktivitete synojnë të ruajnë kujtesën kolektive dhe të nderojnë ata që kontribuuan në çlirimin e Komunës së Podujevës, ndërkohë që qyteti vazhdon të ecë përpara drejt zhvillimit dhe integrimit.