Podujeva i ofron tezgat pa pagesë për t’i larguar shitësit nga rruga

Komunarët e Podujevës i kanë ofruar pa pagesë tezgat e Tregut të Gjelbër për tregtarët e pemëve, perimeve, fidanëve e bulmetit për t’i larguar ata nga rrugët e trotuaret ku tash e ekspozojnë mallin. Para tri ditëve Drejtoria për Planifikim dhe Zhvillim Ekonomik nëpërmjet një ftese publike ka kërkuar nga tregtarët që të aplikojnë për 76 tezgat që gjenden në Tregun e Gjelbër.

Zëdhënësi i Komunës, Fatri Zhitia, ka thënë se për tre ditë kanë aplikuar 26 tregtarë.

“Bëhet fjalë për 76 tezga, të cilat janë realizuar si pjesë e një bashkëfinancimi në mes të Komunës së Podujevës dhe Riinvest, të hapura zyrtarisht në fushatën e vitit 2017, por që nuk u funksionalizuan kurrë. Për tre ditë sa ka qenë koha për aplikim, kemi pranuar gjithsej 26 aplikime. Si masë lehtësuese për tregtarët dhe me qëllim që të gjendet një zgjidhje sa më e shpejtë për një problem që kemi trashëguar nga qeverisja e kaluar, tezgat do të jepen në shfrytëzim pa pagesë”, ka thënë Zhitia.

Zëdhënësi i Komunës së Podujevës thotë se ky Treg më parë është menaxhuar nga Drejtoria e Shërbimeve Publike dhe se deri tash tezgat nuk janë shfrytëzuar nga askush. Prandaj, Zhitia thotë se nuk e kanë asnjë dokument që dëshmon se ato i janë dhënë dikujt në shfrytëzim.

KOHA ka raportuar në muajin janar për mosfunksionalizimin e këtij tregu, ndërkohë që tregtarët vazhdojnë të ekspozojnë mallin e tyre nëpër rrugë e trotuare, kurse tregun e gjelbër disa prej tyre e shfrytëzojnë parking për vetura. Tregtarët e kishin thënë KOHËS se tregu nuk ka përfunduar dhe se njëra prej arsyeve pse nuk vendosen aty është edhe mungesa e WC-ve publike.

Në anën tjetër, nënkryetarja e Komunës së Podujevës, Marigonë Lahu, ka thënë se fillimisht do të shohin gjendjen e këtij tregu dhe pastaj do të ndërmarrin hapat tjerë për përmirësimin e gjendjes aty dhe vendosjen e tregtarëve në treg.

“Sigurisht që pamja e tregtarëve duke shitur në rrugë, nuk është një pamje e mirë, për shkak se tregtarët duhet ta kenë një vend meritor ku do t’i shesin produktet e tyre. Ne si qeveri fillimisht do të bëjmë skenimin e gjendjes aktuale në tregun e gjelbër, pastaj në bazë të vlerësimit që do ta marrim nga ai skenim i gjendjes ne do të shkojmë edhe me investime të cilat duhet realisht që të ndodhin për funksionalizimin e tregut të gjelbër”, kishte thënë Lahu.

Zëdhënësi i Komunës thotë se Drejtoria e Shërbimeve Publike i ka sanuar dëmet e shkaktuara për këto vjet.

“Tregu i qytetit, i cili është afër Tregut të Gjelbër posedon WC. Ato WC do të jenë në shfrytëzim të tregtarëve që veprojnë në Tregun e Gjelbër. Kurse dëme të tjera të shkaktuara gjatë viteve në tezga dhe në treg, Drejtoria e Shërbimeve Publike ka punuar intenzivisht këto ditë, që ato të sanohen dhe të bëhen gati për tregtarët”, është shprehur Zhitia.

Por, zgjidhje nuk pritet t’i bëhet edhe shitësve të plaçkave. Ata edhe më tutje do të vazhdojnë të shesin në Sheshin “Ali Ajeti” dhe në rrugën ndërmjet dy shkollave fillore, “Shaban Shala” dhe “Naim Frashëri” në qytet.

“Tregu është i gatshëm. Ne iu kemi ofruar lehtësira, duke ua mundësuar që ato t’i shfrytëzojnë pa pagesë. Rrugët dhe trotuaret duhet të lirohen për vetura dhe këmbësorë, me përjashtim të tregut të gjësendeve dhe veglave të punës, i cili do të vazhdojë të funksionojë të shtunave në mes të dy shkollave fillore, ka theksuar zëdhënësi Zhitia.

“Tregu është i destinuar për produkte bujqësore, produkte qumështi dhe vezë. Aty nuk ka hapësirë për t’i sistemuar të gjithë ata që i shesin këto produkte dhe peshat e rënda të produkteve që shesin, janë të papërballueshme për tezgat e destinuara për produkte ushqimore. Ne do të angazhohemi që të bëjmë një zgjidhje të shpejtë edhe për këto kategori tregtarësh”.

Javën e kaluar zyrtarët komunalë kanë takuar edhe tregtarët e lokaleve në Tregun e qytetit. Ata kanë kërkuar që t’i shlyhen borxhet e qirasë.

“Kërkesat për shlyerje borxhesh, kanë të bëjnë me pjesën e lokaleve të cilat janë ndërtuar para Tregut të Gjelbër dhe ato nuk janë subjekt trajtimi në këtë rast. Borxhet ka kompetencë t’i falë vetëm Kuvendi. Kjo çështje duhet të trajtohet më vonë në bashkëpunim me Kuvendin Komunal”, ka thënë Zhitia.

Ndërtimi i Tregut të gjelbër ka përfunduar në vitin 2017 dhe ka kushtuar afro 50 mijë euro, 10 mijë prej të cilave i ka investuar Instituti RIINVEST./koha.net/ (N.Toverlani)