Po vjen vera kurse punimet në rrugën Podujevë-Prishtinë as që kanë filluar, ministria nuk po përgjigjet

Shumica e rrugëve magjistrale në Kosovë janë në gjendje të rëndë me gropa e plasaritje.

Në disa nga këto rrugë nuk ka pasur fare ndërhyrje të shtetit e në disa të tjera punimet janë duke u zvarritur.

Ekspertët e komunikacionit vlerësojnë se ndër shkaqet kryesore të aksidenteve është edhe infrastruktura e keqe rrugore.

Ata thonë se shkak i prishjeve kaq të mëdha të rrugëve është asfaltimi i tyre pa përmbushjen e kritereve

Ndonëse janë bërë përpjekje që të intervenohet në disa magjistrale të tjera që lidhin Prishtinën me qytetet përreth, punimet vazhdojnë me vjet, por puna nuk po kryhet, siç është rasti me ndërtimin dhe zgjerimin e rrugës Podujevë-Prishtinë.

Në këtë aks rrugor ka më shumë se 7 vjet që kanë nisur punimet dhe ende nuk kanë përfunduar.

Në disa segmente ka devijim nga rruga për shkak të urave të papërfunduara.

Derisa, punimet që do të duhej të mbërrinin deri në Prishtinë, janë ndalur në afërsi të fshatit Lluzhan.

Rrugët e dëmtuara janë nga shqetësimet kryesore të deputetëve gjatë pyetjeve parlamentare në Kuvend që i drejtohen ministrit të Infrastrukturës, Liburn Aliu.

Për të gjitha këto rrugë, shumica të nisura e të lëna në gjysmë, KOHA i ka kërkuar sqarime Ministrisë që drejton Aliu, por nga ky dikaster qeveritar nuk kanë kthyer përgjigje.