Përçarje në strukturat lokale të LDK-së | VIDEO

Përçarjet që janë shkaktuar pas largimit të Vjosa Osmanit nga LDK-ja në nivelin qendror janë bartur edhe në nivelin lokal.

Dega e kësaj partie në Mitrovicë ka shkarkuar nga pozitat e tyre kryetarin e Nëndegës në lagjen “Ura e Gjakut”, Bekim Muja, dhe atë të Nëndegës së “Iliridës”, Tafil Peci, me arsyetimin se në vazhdimësi kanë bërë veprime në kundërshtim me politikat e partisë, raporton KOHA.

Muja, që është edhe drejtor i Prokurimit, dhe Peci, drejtor për Kulturë, Rini dhe Sport, thonë se shkarkimet e tyre janë si rezultat i mbështetjes së tyre për Vjosa Osmanin.

“Pjesa më e madhe e strukturës e kemi mbështet Agim Bahtirin dhe kjo ka qenë arsyeja kryesore e vendimit të fundit e që ne pas atij vendimi para tri viteve kemi zhvillu aktivitete politik e kemi fitu në të gjitha nëndegët që kemi pas. Ky vendim shihet haptazi që vjen kundër mendimit tonë të lirë, shihet që mendimi jonë është pak më ndryshe se i kryetarit. Kryesisht mendimi i disa nëndegëve lidhet me vendimin e Kryetares së Kuvendit”, ka deklaruar Peci.

E Muja shtoi se Kamberi ka një frikë që po e ndjek.

“Qëllimi i Safet Kamberit është sepse ai frigohet sepse në asnjë palë zgjedhje z.Kamberi s’ka mundur të vije në balotazh e para dhe e dyta nuk është e vërtetë që ne kemi dalë kundër LDK-së sepse ne qëndrojmë në LDK dhe jemi të zgjedhur direkt nga elektorati. Mos harroni se nëse z.Kamberi e ka marrë këtë vendim sepse ne e kemi mbështetur dhe e mbështesim znj.Osmani, atëherë unë menoj që është gabim i tij”, ka thënë Muja.

Por Kamberi thotë se shkarkimi i tyre është bërë pasi që ata kanë dëmtuar rëndë imazhin e partisë.

“Pas zgjedhjes në atë kohë qeverisë së re lokale, këta janë përfshi në ekzekutivin e z.Bahtirit por fundi i fundit si individ secili mund ta ketë bindjen e vet, por përderisa je zyrtar i Lidhjes Demokratike, i strukturave të Lidhjes Demokratike duhet veprosh konform normave, rregullave dhe qëndrimeve zyrtare që i ka Lidhja Demokratike. Këta kanë vazhdu edhe më tutje duke mos respektu asnjë qëndrim, asnjë vendim të LDK-së”, ka thënë Kamberi.

Përveç Mitrovicës, probleme në Degën e LDK-së ka edhe në Ferizaj. Atje një grup i asamblistëve po kërkon që të bëhet një unifikim i Degës pa Muharrem Sfarqën në krye të saj.

“Po, ne si grup i asamblistëve kemi ndërmarrë një iniciativë për unifikimin e partisë sepse zgjedhjet po afrohen. Mendoj që qytetarët e Ferizajt kanë nevojë për një qeverisje nga LDK-ja, prandaj do t’i shterim të gjitha mundësitë që ta unifikojmë partinë, sepse në këtë gjendje që jemi momentalisht vështirë që do të jemi konkurrentë për të parin e Komunës”, ka pohuar Gëzim Kokollari, asamblist i LDK-së në Ferizaj.

E Sfarqa ka mohuar se ka një iniciativë të tillë.

“Nuk kam asgjë kundër një iniciative të tillë, por ata që vendosin janë strukturat e partisë. Megjithatë, në këtë periudhë çështja e kryetarit nuk është në plan, por unifikimi i mëtejshëm i partisë dhe si të dalim të parët. Unë kërkoj punë dhe angazhim nga secili anëtar, e sidomos nga ata që bartin përgjegjësi në struktura të degës. Njëherë përnjëherë askush nuk e ka shprehur kandidaturën për të parin e Ferizajt, as unë e askush tjetër”, ka thënë Sfarqa.

KOHA ka provuar të marrë ndonjë qëndrim të LDK-së në qendër për këto probleme, por nuk ka marrë përgjigjeje.

Lidhja Demokratike e Kosovës qysh në vitin 2006, kur është ndarë pas mbledhjes që njihet si “Kuvendi i karrigeve”, ka vazhduar të ketë probleme të brendshme.

Edhe në zgjedhjet e fundit ka pasur tension në disa nëndegë.

Partia së fundmi ka përjashtuar edhe kandidaten më të votuar të saj, kryeparlamentaren Vjosa Osmani.