Pas 21 vite LDK-ja në Podujevë përfundimisht në opozitë, pozitën e kryesuesit tani e ka PDK-ja

Hilmi Hoxha nga PDK zgjedhet kryesues i kuvendit të komunës së Podujevës

Kuvendi i komunës së Podujevës, ka vazhduar sot punimet e seancës së ndërprerë dje, për zgjedhjen e kryesuesit të kuvendit, të cilën e udhëhoqi anëtari më i moshuar, Hilmi Hoxha, e ku prezent ishte edhe kryetari i komunës, Shpejtim Bulliqi.

Në fillim të seancës, kandidatja e propozuar, për të cilën u zhvilluan dy raunde të votimit, Adelinë Stublla u tërhoq nga kandidatura, me arsyetimin që po i hapë rrugë një procesi, i cili do të prodhojë zgjidhje, meqë sipas saj në këtë formë nuk po arrihet progres.

Pastaj, kandidat për kryesues të kuvendit u propozua Hilmi Hoxha nga radhët e Partisë Demokratike të Kosovës, i cili pas tri raundeve të votimit, me 19 vota pro u zgjodh kryesues i kuvendit.

Në fjalën e tij inauguruese, kryesuesi i zgjedhur i kuvendit, premtoi bashkëpunim korrekt me të gjithë anëtarët e kuvendit pa dallime, në përmbushjen e detyrave të kuvendit në mënyrë që ky institucion të jetë në shërbim të qytetarëve llapjanë.

Pas zgjedhjes së kryesuesit, fjalë rasti mbajti edhe kryetari Bulliqi, i cili e uroi kryesuesin Hoxha për detyrën e re dhe të gjithë asamblesitët për procesin.

“Uroj kryesuesin e ri të kuvendit dhe gjithë asamblenë, gjithashtu shpreh gatishmërinë e plotë për bashkëpunim me të gjitha grupet në realizimin e shumë punëve të cilat kanë mbetur në gjysmë. Na pret shpejt miratimi i Buxhetit të komunës, pastaj Harta Zonale, dhe unë shpresoj që në projekte madhore të jemi të gjithë bashkë” tha kryetari Bulliqi

Në fund kuvendi zgjodhi edhe përbërjen e Komitetit për Politikë dhe Financa (KPF) në përbërje tre anetarë nga LDK, (Naim Çunaku, Arnisa Sylejmani, Qëndrim Softolli), tre nga LVV, (Florent Hasani, Sebastina Vokrri, Adelinë Stublla), nga një anëtar PDK, Bashkim Syla dhe AAK (Mrika Thaçi) dhe kryesuesi, i cili shkon automatikisht.

Me mbylljen e kësaj seance LDK-ja në Podujevë përfundimisht mbetet në opozitë pasi që nuk udhëheq me asnjë pozitë në Komunën e Podujevës, pasi që mandatin e kaluar edhe pse ishte Shpejtim Bulliqi kryetar komune, kryesuesi ishte nga LDK, konkretisht Fatmir Gashi.

Artikulli paraprakBuzhala i KEDS-it, tregon se a do të ketë nesër reduktime
Artikulli tjetërHilmi Hoxha nga PDK zgjedhet kryesues i kuvendit të komunës së Podujevës