Partitë politike i përgjigjen Thaçit, gati nisja e reformës zgjedhore

Partitë politike parlamentare janë shprehur të gatshme që reforma zgjedhore e nisur në fund të vitit të kaluar të përfundojë së shpejti.

Ditë më parë presidenti Hashim Thaçi ka kërkuar që Kuvendi pas zgjedhjeve lokale t’i kthehet reformës zgjedhore.

Ndërsa, subjektet politike kanë vlerësuar se Kosova është vonuar në këtë proces dhe se ka nevojë për një ndryshim të sistemit zgjedhor.

Lutfi Haziri, nënkryetar i Lidhjes Demokratike të Kosovës ka thënë se kjo parti është pro një kodi buxhetor e cila rregullon edhe zgjedhjen e presidentit, zgjedhjet parlamentare dhe ato  lokale.

Haziri në një deklaratë për lajmi.net ka thënë  se pako ligjore e vitit 2007 nuk  ka dhënë efektet e pritura.

“Janë parë probleme serioze, të cilat kanë dalë gjatë procesit zgjedhor, edhe sa u përket listave, votimit, votës preferenciale, balotazhit dhe probleme tjera, të cilat janë të kushtueshme dhe nuk garantojnë legjitimitet të plotë”, ka vlerësuar Haziri.

Ai ka kërkuar që pas zgjedhjeve lokale të ketë një koncensues mes partive politike dhe me filluar me  për reformën zgjedhore.

“Jemi shumë vonë, në periudhën paszgjedhore duhet me u ulë në mënyrë urgjente, komisionet parlamentare dhe Kuvendi me ndërtuar koncensues politik brenda subjekteve të përfaqësuara në Kuvend, dhe me shoqërinë civile për  ndërtimin e kodit të ri për zgjedhjet në Kosovë”, ka thënë Haziri për lajmi.net.

Që reforma zgjedhore të përfundojë sa më shpejtë është edhe Aleanca për Ardhmërinë e Kosovës, parti kjo e cila në legjislaturën e fundit si parti opozitare, së bashku me Vetëvendosjen dhe Nismën kishin kundërshtuar iniciativën e presidentit Thaçi për reformën zgjedhore.

Muharrem Nitaj anëtarë i kryesisë së kësaj partie ka thënë se Kosova ka nevojë për përfundimin e një procesi të tillë, por sipas tij, reforma zgjedhore është harruar pas përfundimit të çdo procesi zgjedhor.

Madje ai problemet që ka aktualisht sistemi zgjedhor i ka ilustruar me një shembull personal.

“Në përbërjen aktuale të Kuvendit të Kosovës, 40 deputetë kanë vota më pak se sa unë, dhe ata janë zgjedhur deputet, ndërkaq unë me 9 mijë vota jam jashtë Kuvendit. Nuk besoj që ka shembull më të mirë se sa kaq. Vota në këtë vend është e barabartë dhe edhe rezultati duhet të konsiderohet sipas të të njëjtit model. Ai që ka më shumë vota, duhet të jetë zgjedhur”.

“Në këtë kuadër, AAK e sheh më se të nevojshme reformën zgjedhore, menjëherë, në mënyrë që në zgjedhjet e ardhshme të mos shkohet me të njëjtën formulë që e kemi sot”, ka thënë Nitaj për lajmi.net.

Presidenti i Kosovës, Hashim Thaçi ka kërkuar nga Kuvendit që pas përfundimit të raundit të dytë të zgjedhjeve lokale t’i kthehet reformës zgjedhore.

“Presidenti kërkon nga partitë politike që menjëherë pas zgjedhjeve lokale t’i kthehen reformës zgjedhore, si një domosdoshmëri për demokratizimin e sistemit zgjedhor në Kosovë”, ka thënë në Presidenca e Kosovës, ditë më parë për lajmi.net

Ndërsa, Lëvizja Vetëvendosje thotë se deri më tash nuk ka pasur vullnet për përfundimin e reformës zgjedhore.

Deputetja e kësaj partie, Albulena Haxhiu ka thënë për lajmi.net se kjo parti është qe reformat zgjedhore duhet bërë në drejtim të administrimit të zgjedhjeve dhe jo sistemit zgjedhor.

Ajo ka thënë se nga presidenti Thaçi kërkojnë propozime konkrete.

“Ne kohën e reformës zgjedhore ne kemi dërguar qëndrimet tona në raport me reformën për secilën çështje mirëpo as në atë kohë, sikur edhe më parë nuk ka pasur vullnet për të bërë reformat zgjedhore. Dhe as tani nuk duket qe ka vullnet për të bërë diçka në këtë drejtim”.

“Nuk e di se për çfarë saktësisht mendon Thaçi kur përmend reformën zgjedhore dhe se nuk kam parë ndonjë propozim konkret lidhur me këtë. Qëndrimet tona i bazojmë në propozime konkrete”, ka thënë Haxhiu për lajmi.net.

Ndërsa nga Partia Demokratike e Kosovës nuk kanë kthyer ndonjë përgjigjeje lidhur më këtë çështje.

Reforma zgjedhore ishte kthyer në agjendën institucionale në fund të vitit 2016 nga iniciativa e presidentit Thaçi. Kjo nismë e tij ishte bojkotuar nga partitë opozitare në legjislaturën e kaluar, Vetëvendosjes, AAK e Nisma.

Nismën e presidenti Thaçi për reformën zgjedhore në fund të vitit të kaluar, kur Kuvendi i Kosovës përballej me mosfunksionim, ndonëse të rëndësishme, shoqëria civile e kishte vlerësuar se ka nisur në një kohë të papërshtatshme. /Lajmi.net/