Pacolli: Koalicioni me PAN’in, për të evituar zgjedhjet

Behgjet Pacolli e ka quajtur koalicionin me PAN që nënshkroi para pak orësh ‘si opsionin e vetëm për të shmangur zgjedhjet e parakohshme dhe si rrugëdaljen e vetme për të evituar kriza institucionale në vend’.

“Përballë alternativës së shkuarjes në zgjedhje të parakoshme, zinxhirit të krizave që do ta shkatërronin ekonominë e brishtë të Kosovës, imazhin ndërkombëtar të saj, unë, AKR zgjodhëm të merrnim përgjegjësi. Proceset ku ka hyrë Kosova kërkonin përgjegjësi, dhe unë mora përgjegjësi”, ka thënë Pacolli.

Ai ka thënë se ka ndjekur të gjithë skenarët e tjerë që koalicioni me LDK’në të krijonte Qeverinë, por siç thotë ai, nuk u bë asgjë.

“Unë i ndoqa të gjithë skenarët e tjerë, që koalicioni ku unë garova të krijonte qeverinë, por nuk u bë dot asgjë. U sakrifikuam, nuk kërkuam asnjë post, dhe partitë e blloqeve të tjera ishin larg”, ka shtuar presidenti i AKR’së.

Madje, për të argumentuar koalcionin me PAN’in, Behgjet Pacolli ka cituar Martin Luter King’un.

“Martin Luter King, heroi i revolucionit social në SHBA ka thënë: Mund të ndodhë se ju nuk jeni përgjegjës për situatën në të cilën gjendeni. Por do të bëheni përgjegjës, nëse nuk kryeni asgjë për ta ndryshuar”, ka thënë miliarderi Pacolli.

Ndryshe, Pacolli ka nënshkruar marrëveshje koalicioni me PAN’in, e cila garanton numrat e nevojshëm për krijimin e intitucioneve të reja, e cila gjë pritet të ndodhë brenda pak ditësh.