Opozita kritikon ekzekutivin e Podujevës për rritje të shpenzimeve në disa kategori

Rritje të shpenzimeve nëpër disa kategori kanë vërejtur këshilltarët opozitarë në Podujevë për periudhën janar-mars 2021. Sipas tyre, në krahasim me periudhën e njëjtë të vitit të kaluar ka rritje të shpenzimeve për telefona, karburante, ushqim e pije, furnizim për zyre, etj.

Ndërkohë, kanë thënë se për këta tre muaj ka edhe tejkalim të shpenzimeve për kategorinë e pagave.

Këshilltari nga radhët e LDK-së, Mehmet Gashi, ka thënë se nëse vazhdohet me këtë ritëm, atëherë deri në fund të vitit kjo shifër e tejkalimit për paga mund të kalojë 300 mijë euro.

“Si informatë nuk kam vërejtje, por mendoj se deri në këtë periudhë duhet të shpenzohen deri në 25 për qind për projekte kapitale. Te investimet kapitalet është shumë i ulët shpenzimi prej 3.4 për qind. Kemi 16 për qind të buxhetit të shpenzuar në total. Po ashtu, kemi tejkalim për 80 mijë euro për paga, që deri në fund të vitit nëse shkon në këtë formë mund të kalojë 300 mijë euro”, ka theksuar Mehmet Gashi.

Edhe këshilltari i PDK-së, Rafet Llapashtica, ka thënë se në bazë të raportit financiar janar-mars, ka vërejtje.

“Shohim që do të kemi suficit, edhe pse kemi nevojë për investime për të gjitha fushat. E shohim që ish-pushteti ka neglizhuar 3 milionë euro (më 2020 v.j.). Vetëm një dinamikë e kemi parë te pagesa prej 8 për qind për paga. Si ndodhi që të bëhen pagesa më shumë se sa punëtorë?”, ka pyetur Llapashtica. “Kemi pas një kërkesë që të subvencionohen rastet me Covid dhe ata që kanë pasur raste të vdekjeve për shkak të pandemisë. Po i shohim disa subvencione për raste të vdekjeve dhe disa janë mbi 300, disa mbi 500. A janë bërë pagesat për shkak të gjendjes së rëndë ekonomike, a kushton një varrim ma shtrenjtë, apo hoxha ka marrë për dikë më shumë e për dikë më pak. Edhe pse Bashkësia Islame i kryen procedurat dhe mjetet i ndan komuna”.

Këshilltari i PDK-së ka kritikuar pushtetin se zyrtarët komunalë po shëtisin me vetura zyrtare edhe në ditë vikendi dhe e ka përmendur një aksident që ka ndodhur me veturë zyrtare.

“Janë rrit shpenzimet e telefonisë, e mirëkuptova se për shkak të pandemisë, po nuk i mirëkuptoj shpenzimet e derivateve me staf esencial”.

Edhe shefi i Grupit të këshilltarëve të LDK-së, Hasan Ajeti, ka thënë se gjatë këtyre muajve ka vërejtur rritje të disa shpenzimeve, e të cilat, sipas tij, VV-ja sa ishte në opozitë i konsideronte “shpenzime luksi”.

“Kemi rritje të shpenzimeve në krahasim me periudhën e njëjtë të vitit të kaluar për telefoni, furnizim me ushqim e pije, furnizim për zyrë, karburant për vetura, naftë për ngrohje, furnizim pastrimi, shto edhe këtu shpenzimet për uniforma për inspektorët që nuk janë në raport”, tha ai.

Ndërkohë, kryetari i Komunës së Podujevës, Shpejtim Bulliqi, ka thënë se sa i përket subvencioneve që janë dhënë për rastet e vdekjeve, kjo është e rregulluar me ligj që për çdo familjar të zyrtarëve komunalë që ndërron jetë, i takon një pagë.

“Sa i përket makinës së aksidentuar, ka qenë me personel shëndetësorë për vizitë zyrtare dhe aksidentet secilit prej nesh na ndodhin. Për telefoni nuk ka mundësi të ketë rritje, as për telefoni as për derivate, kemi zvogëlim”, ka thënë ai.

 

Drejtori për Buxhet dhe Financa, Fatlum Osmani, ka theksuar se për shkak të motit nuk kanë mundur të kenë më shumë buxhet të shpenzuar për projekte kapitale.

“Tash në prill kemi shumë procedura të prokurimit që janë duke u zhvilluar. Edhe për mallra dhe shërbime, edhe për subvencione duhet të zhvillohen procedurat e prokurimit”, tha ai.