Opozita: Ata që kanë probleme me ligjin të mbesin jashtë listave zgjedhore

Subjektet opozitare thonë se personat të cilët kanë probleme me ligjin nuk duhet të përfshihen në listat zgjedhore.

Opozitarët thonë se partitë politike nuk kanë ndonjë vendim për këtë çështje, mirëpo theksojnë nevojën që personat e dënuar për korrupsion apo për përfshirje në krim të organizuar të mbeten jashtë proceseve zgjedhore lokale e qendrore.  Sipas tyre, kjo çështje duhet të rregullohet me ligj, por thonë se reforma zgjedhore është vonuar qëllimisht nga partitë në pushtet.

Deputeti i Lëvizjes Vetëvendosje, Rexhep Selimi ka thënë për lajmi.net se subjektet politike do të duhej që të kandidonin persona kredibil dhe se duhet pasur parasysh “pastërtia penale”. Megjithatë, Selimi ka thënë se nuk duhet tu ndalohet e drejta e kandidimit personave ndaj të cilëve ka aktakuza politike.

“Në anën tjetër nuk do të duhej të shiheshin njëjtë kushdo që është në procese gjyqësore për shkak të aktiviteteve politike, sepse ka edhe  të tjerë që për shkak të aktiviteteve politike ka aktakuzat pabazuara. Kështu duhet të bëhet dallimi në mes të atyre që kanë aktakuza për korrupsion, krim të organizuar e të tjerë dhe atyre që kanë aktakuza politike, siç ka qenë edhe aktivisti Astrit Dehari”, ka deklaruar Selimi.

Më tej, deputeti i Vetëvendosjes ka thënë se kjo çështje do të duhej të ishte e rregulluar me ligj, por sipas tij, në mungesë të rregullimit me ligji, mbetet në vullnetin e subjekteve politike që ta bëjnë këtë qoftë edhe përmes një memorandumi të përbashkët. Por në fund të fundit sipas Selimit, qytetari do ta vlerësoj vetë se kush duhet ta përfaqësoj.

Edhe Aleanca për Ardhmërinë e Kosovës konsideron se personat e zhytur në krim dhe korrupsion duhet të mbesin jashtë listave zgjedhore.

“AAK-ja konsideron se ata të cilët janë zhytur në krim dhe korrupsion dhe janë të dënuar duhet të jenë jashtë listave zgjedhore, sepse  njerëzit e inkriminuar nuk kanë vend në politikë. Në fund të fundit dënimin ua jep votuesi, por edhe partitë politike duhet të jenë të ndërgjegjësuar anë mënyrë që mos lejojnë që në lista të kenë njerëz të korruptuar dhe të cilët kanë rënë në kundërshtim me ligjin. Kjo është çështje e parimit”, ka thënë për lajmi.net nënkryetari i AAK-së, Ahmet Isufi.

Ai më tej ka thënë se kjo çështje duhet të rregullohet, pasi sipas tij, në krye të institucioneve shtetërore ka njerëz të korruptuar dhe të përfshirë në krim të organizuar.

Kundër përfshirjes së personave të përfshirë në krim të organizuar e korrupsion në listat zgjedhore është edhe deputeti i Nismës për Kosovën, Zafir Berisha. Ai ka thënë se reforma zgjedhore është vonuar qëllimisht.

“Kjo çështje duhet të rregullohet edhe me ligj. Reforma zgjedhore, e cila me qëllim është vonuar  duhet ta parasheh që personat të cilët kanë vepra penale duhet të sanksionohen nga pjesëmarrja në gara zgjedhore, sepse vendit nuk i bënë nderë një person që ka bërë shkelje ligjore”, ka theksuar Berisha.

Përndryshe, presidenti i vendit, Hashim Thaçi me t’u zgjedhur në postin e kreut të shteti ka dalë me qëndrimin kundër përfshirjes në listat zgjedhore të personave që kanë probleme me ligjin. /Lajmi.net/