Onkologu kandidat për kryetar të komunës së Podujevës, kolegët e QKUK-së i urojnë suksese

Onkologu Ekrem Hyseni ka shpallur kandidaturën për kryetar të komunës së Podujevës nga radhët e Lidhjes Demokratike të Kosovës.

Hyseni ka thënë se kandidatura e tij vjen si rezultat i kërkesave të votuesve të tij në Llap, si dhe vendimit të kryetarit të partisë Lumir Abdixhiku, transmeton Gazeta Shneta.

“Do t’i prijë këtij procesi me secilën e secilin prej jush që e doni Llapin tonë të zhvilluar në nivelin që e meriton. Kam nevojë për angazhimin e secilit aktivist e veprimtar. Unë i prijë garës dhe gjithë këtij procesi, por, kjo s’më bën aspak më të rëndësishëm se secilin prej votuesve, aktivistëve e veprimtarëve, pa angazhimin e të cilëve, Podujeva nuk do të ishte bastion i LDK-së. Bashkë me ju, do t’ia kthejmë shkëlqimin Komunës së Podujevës, Llapit tonë, dhe LDK-në do ta kthejmë në vendin e parë, aty ku e meriton”, ka shkruar Hyseni.

Atë e kanë uruar edhe kolegët mjekë që punojnë në QKUK. Gjinekologët Jakup Ismajli e Curr Gjocaj, onkologia Brunilda Profka Haxhiu, infektologu Izet Sadiku, urologu Fahredin Veselaj, radiologia Serbeze Kabashi -Muçaj, kardiologu Artan Ahmeti, etj. janë disa prej kolegëve që e kanë uruar Hysenin me komente në postimin e tij. /Gazeta Shneta/