Njohësi i sigurisë: Nuk ka valë të re emigrantësh, por paralajmërim për institucionet

Që disa ditë në opinionin publik po qarkullojnë disa pamje të qytetarëve kosovar në stacionin e autobusëve në Prishtinë.  Madje po flitet për një valë të re migrimesh drejt vendeve të BE-së, si shenjë revolte për kushtet jo të mira në Kosovë.

Mirëpo, njohësi i çështjeve të sigurisë, Burim Ramadani, thotë se kjo mund të kthehet në një “profeci të vetëpërmbushur” nëse institucionet e Kosovës nuk e marrin seriozisht mundësinë e organizimit të një fluksi të tillë nga rrjetet kriminale.

“Një fluks i ri i migrimit ilegal nga Kosova është paralajmëruar tashmë disa javë. Kjo duhet të kthehet në një ‘profeci të vetëpërmbushur’ nëse institucionet e Kosovës nuk e marrin seriozisht mundësinë e organizimit të një fluksi të tillë nga rrjete të ndryshme kriminale. Në fund të fundit, në vitin 2015 institucionet e Kosovës patën thënë se i tërë fluksi ishte i organizuar nga rrjete kriminale. Në fakt, motivet e largimit në një fluks të tillë janë pothuajse të njëjta me ato të pak viteve më herët, përkatësisht nuk është përmirësuar jeta e qytetarëve gjatë kësaj periudhe dhe nuk është rritur shpresa qytetare se Kosova do të triumfojë përballë të këqijave të tashme” ka thënë Ramadani.

Ramadani më tutje ka shtuar se kjo situatë duhet t’ju shërbejë vetëdijesimit të institucioneve.

“Duket se numri i qytetarëve të interesuar për migrim ilegal është rritur kohëve të fundit dhe kjo duhet të jetë një situatë e re vetëdijësuese për institucionet. Nuk besoj se do të ketë fluks të madh të emigrantëve. Porse, edhe numri më i vogël është dëmtues për Kosovën në raport me proceset e integrimit”, ka shtuar Ramadani për Indeksonline.

Në fund ai theksoi se askush nuk mund të përfitojë leje-qëndrim në shtetet e BE-së. Prandaj, sipas tij, institucionet e Kosovës duhet të marrin seriozisht punën e përmirësimit të shërbimeve publike për qytetarët, përmirësimin e sigurisë, gjendjes ekonomike dhe mundësimin e realizimit të drejtave qytetare.

Qytetarët kanë shfaqur shqetësimet e tyre lidhur me paralajmërimin se një eksod këto ditë është duke ndodhur. Në anën tjetër Policia e Kosovës dhe zyrtarë në Stacionin e Autobusëve kanë thënë se nuk bëhet fjalë për ndonjë eksod, por udhëtarë dhe kureshtar për gjendjen aty./Indeksonline/