Nishani refuzon takimin me ambasadorin e SHBA

Pas akuzave të rëndë mes prokurorit Llalla dhe ambasadorit të SHBA-së Donald Lu, mësohet të jetë refuzuar takimi i presidentit të Shqipërisë Bujar Nishani dhe ambasadorit të SHBA-së.

Mësohet se ka qënë Nishani i cili ka refuzuar këtë takim të kërkuar nga Lu për shkak se sipas Nishanit akuzat e adresuara sot ndaj Prokurorit të Përgjithshëm, Adriatik Llalla janë shumë të rënda dhe për to kërkohet një sqarim në rrugë institucionale dhe zyrtare.

Në adresë të Presidentit të Republikës, më herët nuk ka mbërritur asnjë shqetësim nga partnerët strategjikë të Shqipërisë sa i përket rolit të Prokurorit të Përgjithshëm, Adriatik Llalla ndaj dhe Bujar Nishani, në cilësinë e kreut të shtetit ka kërkuar kohë të nevojshme për t’u njohur më në detaje lidhur me pretendimet e ngritura sot publikisht nga ambasadori amerikan.

Ndërkohë fill pasi akuzoi Prokurorin e Përgjithshëm për shkelje të Kushtetutës dhe për faktin se për 18 muaj me rradhë ka qenë kundër reformës në drejtësi, ambasadori i SHBA-ve, Donald Lu pati sot takime “kokë më kokë” me ministrin e Brendshëm, Saimir Tahiri, shkruan Albeu.