Nexhmi Rudari pajtohet me të gjeturat dhe rekomandimet e Auditorit të Përgjithshëm që kanë të bëjnë me Komunën e Podujevës |DOKUMENT

Auditori i përgjithshëm në publikimin e raportit për Komunën e Podujevës për vitin 2019 flet për shumë shkelje dhe menaxhim të keq të buxhetit, transmeton PodujevaPRESS.net

Nënkryetari i komunës së Podujevës në një shkresë drejtuar Auditorit të Përgjithshëm ka shkruar se pajtohet me të gjeturat dhe rekomandimet dhe nuk ka ndonjë koment për përmbajtjen e Raportit si dhe brenda 30 ditëve nga pranimi i Raportit final do ta dorëzojë një plan veprimi për zbatimin e rekomandimeve.

Kujtojmë se auditori i Përgjithshëm për vitin 2019 ka gjetur shumë shkelje dhe parregullësi.

Njëra prej tyre është edhe kur Komuna e Podujevës për ndërtimin e trotuareve nëpër disa fshatra Llot 2, kishte lidhur kontratë më datën 19.08.2019 në vlerë 331,177€, ndërsa kishte eliminuar operatorin ekonomik që kishte ofertën më të lirë me vlerë 255,447€, që i bije rreth 75 mijë euro më shumë.

Poashtu Auditori ka gjetur edhe kur Komuna e Podujevës kishte angazhuar nëntë persona përmes marrëveshjeve për shërbime të veçanta për të cilët nuk ishte zbatuar një procedurë e thjeshtësuar e rekrutimit.

Një rast është sipas auditorit kur Komuna e Podujevës u detyrua ta paguaj 31,128€ një punëtore të arsimit të larguar nga puna pa bazë ligjore.

Komuna e Podujevës për riparimin e rrugëve të asfaltuara kishte lidhur kontratë kornizë më 28.06.2018 me afat deri më 28.10.2019. Edhe pse kjo kontratë kishte skaduar komuna kishte vazhduar me porositje të shërbimeve duke tejkaluar dy pozicione në vlerë 4,477€.

Tek pagesa e avansit në kundërshtim me ligjin e buxhetit Komuna e Podujevës me datë 10.12.2019,  kishte paguar si paradhënie 184,310€ për ndërtimin e bulevardit.

Pra këto janë një pjesë e keqpërdorimeve të buxhetit nga Komuna e Podujevës ku edhe vet z.Rudari e pranon me anë të kësaj shkrese.