Nesër ka protesta në Podujevë, për këtë arsye

Nesër një numër I konsiderueshëm i bizneseve do të protestojnë në komunën e Podujevës, pasi Terminalit Doganor “Diana” do t’i përfundoj licenca dhe do të tërheqet stafi meqë ndalet operimi zyrtar.

Ky njoftim i bizneseve erdhi pas njoftimit nga Dogana e Kosovës. Ata u ankuan se janë njoftuar vetëm tri ditë para përfundimit të licencës, ku sipas tyre është dashur të jenë në dijeni një muaj më parë, shkruan IndeksOnline.

“Ju njoftojmë se nesër më 17 qershor 2022 ora 13:00 do të ketë protest nga firmat që operojnë në Podujevë për shkak se Dogana e Kosovës sot më 16 qershor 2022 na ka njoftuar se do të terhjek oficerët doganor nga terminali doganor në Podujevë dhe ne si biznese nuk kem se nga të shkojmë pasi që terminal shtetëror në komunën e Podujevës nuk ekziston”, thuhet në njoftimin e bizneseve për protestë.

Lidhur me këtë ka njoftuar edhe deputeti nga radhët e Lëvizjes Vetëvendosje nga komuna e Podujevës, Fitim Haziri.

Ai tha se vendimi i Qeverisë është që të gjitha Terminalet Doganore t’i kthehen në pronësi shtetit duke ditur se si u janë dhënë grupeve të interesit në të kaluarën.

“Sa për njoftim rreth Terminalit Doganor në Merdare!

Më 17.06.2022 Terminalit Doganor “Diana” sh.p.k do t’i përfundojë liçenca.

Vendimi i Qeverisë është që të gjitha Terminalet Doganore t’i kthehen në pronësi shtetit duke ditur se si u janë dhënë grupeve të interesit në të kaluarën.

Është krijuar komisioni ndërqeveritar dhe është caktuar lokacioni për ndërtimin e Terminalit të Ri në Komunën e Podujevës. Lokacioni i identifikuar në Podujevë është në hapësirën e Parkut Industrial.

Kostoja e qirasë e cila i është ofruar shtetin nga Terminali privat është e lartë në shifër prej 30 mijë euro në muaj dhe brenda viti kjo kosto do të shkonte në 360 mijë euro. Qëllimi është ndërtimi i një terminali të ri dhe të evitohet pagesa e qirasë.

Një gjë është e sigurt; Podujeva nuk do të mbetet pa terminal”, shkroi ai./IndeksOnline/