Zëvendësministri i Punëve të Brendshme, Nehat Mustafa ka thënë se vetëm 20 ish pjesëtarë të UÇK-së kërkohen nga INTERPOL. Ai nëpërmjet një postimi në Facebook, ka hedhur poshtë shifrat e publikuara në medie. Sipas tij nga 157 emrat që janë publikuar sot në medie vetëm 20 prej tyre janë ish pjesëtarë të UÇK-së.
Ai ka bërë me dije se Policia e Kosovës, konkretisht Drejtoria për Bashkëpunim Ndërkombëtar në Fushën e Zbatimit të Ligjit ILECU ka verifikuar të gjithë 157 emrat të cilët janë pjesë e kësaj liste dhe e cila po prezantohet nëpër media si listë e INTERPOL-it.
“E vërteta është se vetëm 20 nga këta 157 emra janë në listën e INTERPOLIT. Policia e Kosovës, më 16 .12.2016 përmes zyrës së INTERPOL-UNMIK ka dërguar ankesë për futjen e këtyre 20 personave në listën e kërkimit nga INTERPOL dhe ka këkuar largimin e tyre. Përndryshe, dhjetëra emra janë larguar nga kjo listë si rezultat i reagimit të vazhdueshëm të Policisë së Kosovës”, ka shkruar Mustafa.
Ai ka thënë se lista prej 157 ish pjesëtarëve të UÇK e cila po prezantohet nëpër media si listë e INTERPOLIT, në të vërtetë është listë e publikuar në “Libri i Bardhë” i nxjerr nga Qeveria e Serbisë në vitin 2003.
