Më 14 shkurt të drejtën e votës për herë të parë e kanë 49 mijë e 198 votues të rinjë që kanë mbushur 18 vjeç pas zgjedhjeve të vitit 2019

Dita e zgjedhjeve të jashtëzakonshme po afrohet, ndërsa një numër i konsiderueshëm të rinjsh do të votojnë për herë të parë më 14 shkurt.

Zëdhëndësi i KQZ-së, Valmir Elezi, ka treguar për Ballkani.info, se në këto zgjedhje për herë të parë do të garojnë  49 mijë e 198 votues.

“Komisioni Qendror i Zgjedhjeve ka certifikuar listën përfundimtare të votuesve, sipas të cilës janë: 1 milion e 794 mijë e 862 votues në vendin tonë, që më 14 shkurt mund të votojnë.  Nëse lista e votuesve e këtyre zgjedhjeve krahasohet me të zgjedhjeve paraprake, 2019, atëherë në këto zgjedhje kemi 143 mijë e 6 votues më pak. Numri i votuesve të rinj në këto zgjedhje, pra që do të votojnë për herë të parë pasi kanë mbushur 18 vjeç pas zgjedhjeve të vitit 2019, është: 49 mijë e 198 votues”, ka pohuar Elezi.

Ai ka treguar se më 14 shkurt do të hapen 888 qendra të votimit me gjithsej 2 mijë e 382 vendvotime.

“Numri i votuesve që nuk kanë qenë në listën votuese 2019, e të cilët konsiderohen të regjistruar për herë të parë në regjistrin qendror civil mes dy palë zgjedhjesh është: 10 mijë e 433 votues. PASTRIMI I LISTËS VOTUESE:  Nga lista votuese janë larguar 122 mijë e 421 persona të cilët kanë vetëm dokumente të identifikimit të lëshuara nga UNMIK-u. Duke pasur vetëm dokument të lëshuar nga UNMIK-u, një votues nuk mund të identifikohet në vendvotim. Po ashtu, nga lista votuese janë larguar 11 mijë e 86 persona të cilët janë larguar nga skema pensionale e Kosovës për shkak se kanë vdekur. Të dhënat janë marrë nga Ministria e Punës dhe Mirëqenies Sociale dhe janë konfirmuar në terren nga Zyrtarët Komunal të Zgjedhjeve. QENDRAT E VOTIMIT DHE VENDVOTIMET: Në ditën e zgjedhjeve më 14 shkurt do të hapen 888 qendra të votimit me gjithsej 2 mijë e 382 vendvotime”, ka theksuar Elezi për Ballkani.info.