Mbyllet qendra e Podujevës, nis ndërtimi i sheshit
Mëngjesin e sotëm, një pjesë e rrugës “Zahir Pajaziti” në Podujevë është mbyllur për qarkullim të automjeteve.
Mbyllja e një segmenti është bërë me shkas të ndërtimit të Bulevardit dhe “Sheshit të dëshmorëve” në këtë pjesë të qytetit.
Pak ditë më parë, Komuna e Podujevës nëpërmjet një njoftimi ka kërkuar nga qytetarët që t’i shfrytëzojnë rrugët e tjera për qarkullim.
“Njoftojmë qytetarët e Komunës së Podujevës se për shkak të fillimit të realizmit të projektit ndërtimi i bulevardit dhe sheshit ‘Sheshi i dëshmorëve’ në qendrën e qytetit, duke filluar nga 20.01.2020 do të mbyllet për qarkullim të automjeteve një segment i rrugës ‘Zahir Pajaziti’ në Podujevë.
Drejtoria e Planifikimit Urban dhe Mbrojtjes së Mjedisit e Komunës së Podujevës njofton qytetarët se për shkak të fillimit të realizmit të këtij projekti…një segment i rrugës ‘Zahir Pajaziti’ (nga udhëkryqi i rrugëve ‘Zahir Pajaziti’ – ‘Dr.Bajram Krasniqi’ deri tek udhëkryqi i rrugëve ‘Zahir Pajaziti’ –‘19 Qershori’ – Rruga e re te Xhamia), do të mbyllet për qarkullim të automjeteve duke filluar nga e 20.01.2020, deri në përfundimin e punimeve”, thuhet në njoftimin për shtypin të Komunës.