Masa të reja apo mbyllje? Ky është lajmi i fundit nga Ministria e Shëndetësisë

Numri i vdekjeve dhe rasteve të reja me Covid-19, është duke u rritur dita-ditës në Kosovë.

Vetëm sot janë shënuar shifra rekorde të të infektuarve ku për 24 orë janë regjistruar edhe 923 raste të reja me virusin SARS-Cov2.

Por, pavarësisht rritjes së numrit të rasteve ende nuk ka vendim për masa të reja, të cilat do të mund të ulnin rastet e infektimeve

Në Ministrinë e Shëndetësisë kanë thënë për Front Online, se aktualisht mbesin në fuqi masat e njëjta.

Por, se situata epidemiologjike i nënshtrohet monitorimit ditor nga Instituti Kombëtar i Shëndetësisë Publike.

“Situata epidemiologjike i nënshtrohet monitorimit ditor nga IKSHPK-ja dhe analizave të rregullta epidemiologjike. Varësisht nga rrjedha e saj mund edhe të propozohen masa të ndryshme, por tash për tash mbesin në fuqi masat e ndërmarra më herët”, thuhet në përgjigjen e MSh-së, për Front Online.

Të pyetur se a do të mblidhet këtë javë Komiteti për menaxhimin e Covid-19, për të marrë ndonjë vendim lidhur me masat e reja duke parë rastet e shumta të të infektuarve, në Ministrinë e Shëndetësisë nuk kanë dhënë përgjigje.

E, shefja e zyrës së OBSh-së, në Kosovë, Isme Humolli gjatë ditës së djeshme ka deklaruar se është e domosdoshme që të përforcohen masat për parandalimin e përhapjes së Covid-19.

“Mbyllje totale se si ka qenë në fillim të pandemisë kur nuk u dike as virusi nuk besoj që do ketë, por është e domosdoshme të përforcohen masat”, ka thënë Humolli.

Në mbrëmjen e 28 marsit, në Kosovë arritën dozat e para të vaksinës kundër Coronavirusit.

Bëhet fjalë për 24 mijë doza të vaksinës së prodhuar nga AstraZeneca, të cilat Kosova i ka pranuar nga programi COVAX i Organizatës Botërore të Shëndetësisë.

Kryeministri i Kosovës, Albin Kurti tha se arritja e këtij kontigjenti do të mundësojë shpëtimin e jetës së njerëzve.

“Është ky një kontingjent i vogël, por që ngjallë shpresë të madhe në vendin tonë për fillimin e shpëtimit të jetës së njerëzve, sidomos të personelit tonë shëndetësorë dhe grupeve popullsisë në rrezik”, tha Kurti.

Ai tha se Kosova ka humbur kohë shumë për sigurimin e vaksinave, por shtojë se tani duhet të vepruar dhe sipas tij “vaksinimi duhet të fillojë menjëherë” dhe pa vonesa.

“Vendi ynë është i vogël dhe varfër andaj edhe ka nevojë për mbështetje të madhe dhe solidaritet nga të gjithë, e sidomos nga miqtë tanë, Shtetet e Bashkuara të Amerikës dhe Bashkimi Evropian, të cilët edhe janë donatorët kryesorë të aleancës GAVI COVAX”, shtoi Kurti.

Ministri i Shëndetësisë, Arben Vitia tha se Kosova tani fillon fazën e re të luftës kundër pandemisë, përmes nisjes së vaksinimit.

“Edhe pse vaksinimi po fillon, nuk do të thotë se kësaj pandemie po i vjen fundi”, tha Vitia, duke kërkuar që të vazhdohen të respektohen masat kundër Coronavirusit siç është mbajtja e maskës, e distancës dhe e higjienës personale.

Mbrëmë ish-ministri i Shëndetësisë, Armend Zemaj ka thënë se për qytetarët e Kosovës janë konfirmuar edhe 100 mijë e 620 vaksina anti-Covid.

“Nga komunikimi i fundit që arriti sot nga COVAX, (për sigurimin e radhës së vaksinës Pfizer-BioNTech) komunikim të cilin ia përcolla ministrit Vitia për ta vazhduar atë zyrtarisht, konfirmohen 100.620 vaksina anti-Covid-19 në qershor, për qytetarët e Republikës së Kosovës. Shpreh edhe një herë falënderimin e thellë për shtetet mike, organizatat ndërkombëtare dhe vendore si dhe ekipin profesional të Republikës së Kosovës të cilët u angazhuan me muaj të tërë për sigurimin sa më të shpejtë të vaksinave”, ka shkruar Zemaj në Facebook.

Kosova është vendi i fundit që ka siguruar vaksina anti-Covid, derisa vaksinimi i personelit mjekësor i cili ka filluar të hënën është duke vazhduar ende.