Marrëveshja LDK-VV ishte gati të kryhej sot, çuditërisht po prishet?!

Isa Mustafa dhe Albin Kurti kanë filluar një takim të radhës në përpjekje për të nënshkruar një marrëveshje bashkëqeverisjeje.

Ata sot shpresonin të kishin një ceremoni nënshkrimi e buzëqeshje, me shtrëngim duarsh, por gjërat kanë ndryshuar paksa.

Lidhja Demokratike e Kosovës dhe Lëvizja Vetëvendosje e kishin pothuajse gati marrëveshjen për koalicion qeverisës.

Postet ministrore ishin ndarë dhe kishte marrëveshje edhe për postet tjera të larta, Kryeministrin, Presidentin dhe Kryetarin e Kuvendit.

Çfarë kishte mbetur të bëhej sot ishte një dakordim përmes kryesive të të dyja partive dhe gjetja e emrave për ministra dhe postet tjera.

Të dy partitë, VV dhe LDK i mblodhën herët kryesitë dhe çuditërisht procesi filloi të marrë kaheje tjetër.

Në publik doli konflikti i nënkryetarëve të LDK-së, Agim Veliut dhe Vjosa Osmanit. I pari i kërkoi të dytës ‘sqarim për fotografinë e djeshme në Kuvend me Albin Kurtin, e kjo ia ktheu se “nuk e ka ndërmend t’i japë sqarime askujt”.

“E di që ajo i jep llogari tjetërkujt. Por, unë nuk i kam kërkuar të më japë llogari mua”, iu kundërpërgjigj Veliu, Osmanit.

Gjatë ditës së sotme, në skenë doli edhe Lutfi Haziri, por ai foli për ‘gjasat e mëdha’ që sot të arrihet marrëveshja. Madje foli me fjalë të mëdha për koalicionin, duke e cilësuar si një ndryshim të madh.

I njëjti e shoqëri Mustafën në takimin me Kurtin që po ndodh në Kuvend, bashkë me Agim Veliun e Avdullah Hotin, duke mos e marrë me vete këtë herë Vjosa Osmanin.

Ndërkohë që në kampin e LDK-së gjërat u trazuan pak, njëjtë ndodhi edhe në VV. Ata filluan të dalin me qëndrime se nuk janë afër marrëveshjes dhe se “LDK-ja po barrikadohet për presidentin”.

Në fakt edhe vetë VV-ja po barrikadohet për presidentin. Liburn Aliu dhe Albulena Haxhiu folën për gjasa të vogla të një marrëveshje, së shpejti.

“Kemi mosmarrëveshje sidomos të çështja e Presidentit, por ka edhe pika tjera, njëfarë barrikadimi pak i i tepruar është prej anës së LDK-së, ne kemi me insistu me u taku me bisedu”, tha Aliu të shtunën.

Të kundërtën pretendojnë në LDK. Zëdhënësi i saj, Besian Mustafa tha se nuk kanë barrikadim por vullnet për marrëveshje. Ata thanë se vetëm insistojnë në kushtet e tyre.

Takimi Albin Kurti-Isa Mustafa, në Kuvend, me bashkëshoqëruesit e tyre ka filluar.

Mbetet të shihet, a do të dalë tym i bardhë sonte nga Kuvendi i Kosovës? /reporteri