MAPL financon projektin e një militanti të LDK-së, Gecaj thotë se s’ka gisht në këtë punë (Foto)
Ministria e Administrimit dhe Pushtetit Lokal sot ka nënshkruar një marrëveshje mirëkuptimi me organizatën Jo-Qeveritare “Lëvizja Rinia”, për financimin e projektit “Të gjithë të ndryshëm, të gjithë të barabartë”.
Qëllimi kryesor i projektit “Të gjithë të ndryshëm, të gjithë të barabartë” është që të kontribuoj në promovimin dhe zhvillimin e vlerave kulturore dhe diversitetit kulturor, si dhe ndërtimin e paqes dhe tolerancës.
E përfaqësuesi i OJQ-së që do të financohet nga MAPL-ja, Egzon Pacolli po del të jetë pikërisht militant i Lidhjes Demokratike të Kosovës, parti nga e cila vjen edhe zëvendësministri i MAPL-së, Bajram Gecaj.
Sipas burimeve të Indeksonline, Pacolli punon në Grupin Parlamentar të LDK-së dhe merr pjesë pothuajse në çdo tubim të kësaj partie, e kjo dëshmohet edhe sipas fotove ku ai shihet me anëtarë e deputetë të LDK-së.
I kontaktuar nga Indeksonline, Gecaj ka thënë se përzgjedhjen e kësaj OJQ-je e ka bërë komisioni i caktuar që ka shqyrtuar kërkesat për financim.
E i pyetur se a ka ndikuar ky fakt që lëvizja e Pacollit të përfitoj nga financimi, Gecaj e ka mohuar këtë.
“Jo fare, lëvizja Rinia ka aplikuar në thirrjen e MAPL dhe është komisioni profesional i cili i ka shqyrtuar të g gjitha kërkesat. Për më shumë ju lutem ti drejtoheni me shkrim MAPL”, tha Gecaj, duke mos dashur të komentoj lidhjen e përfituesit me LDK-në. /Indeksonline/
