Llapjani që nderojë Republikën e Kosovës (Foto)

Oficeri i FSK-së, Ismajl Hoxha para disa kohësh u shpall si më i miri nga ndërkombëtarët në Akademinë Mbretërore Ushtarake Sandhurst në Britaninë e Madhe.

Në dhjetor 2015, pas 12 muajsh shkollim në Akademinë Mbretërore Ushtarake Sandhurst, në Britaninë e Madhe, oficeri i Forcës së Sigurisë së Kosovës, Ismajl Hoxha fitoi çmimin oficer-kadeti më i mirë ndërkombëtar, duke u bërë kështu oficeri i parë nga Ballkani që fiton një çmim të tillë.

Komandanti i Forcës së Sigurisë së Kosovës (FSK), gjenerallejtënant Rrahman Rama i shoqëruar edhe Ambasadori i Kosovës në Londër, Lirim Grajçevci, mori  pjesë në ceremoninë e diplomimit të kadetëve në Akademinë Ushtarake Mbretërore Sandhurst, të Mbretërisë së Bashkuar.

Me rastin e shpalljes së oficerit të FSK-së, Ismajl Hoxha, kadeti me rezultatet më të larta nga oficer- kadetët ndërkombëtarë,  komandanti i FSK-së, gjenerallejtënant Rrahman Rama tha se  çmimi i sotëm dhe diplomimi i oficerëve të FSK-së, ka rëndësi të veçantë për Forcën e Sigurisë së Kosovës dhe Kosovën. “Po ndihem shumë i nderuar dhe i privilegjuar që jam sot këtu në cilësinë e komandantit. Është nder dhe është ngjarje historike edhe për Kosovën, por edhe për FSK-në, familjen dhe të gjithë ne”, tha Ai.

Oficeri i FSK-së Ismail Hoxha në ceremoni i është dhuruar shpata si nderim për çmimin e fituar, pikërisht nga Princi Charles, i cili ka ndarë çmimet më të larta në emër të Mbretërisë së Bashkuar dhe Akademisë Mbretërore angleze.

Princi Charli, para të pranishmëve në fjalën e tij, tha: “Sot është ditë feste për të kumtuar arritje të mëdha të njerëzve që meritojnë urimet më të ngrohta. Ju po merrni çmimet tuaja në një kohë kur profesioni ushtarak po zhytet në ujëra të turbullta. Shtyllat e rendit ndërkombëtar janë duke u sfiduar si kurrë më parë gjatë gjithë jetës time. Në të njëjtën kohë një kult vdekjeje dhe shkatërrimi është duke defiluar nëpër tokat e vjetra duke joshur një numër të frikshëm të të rinjve që përfundojnë të vdekur. Në ballë të këtyre sfidave, vlerat tradicionale britanike–sjellja e ndershme, qytetërimi, një dozë humori në vështirësi–mbesin po aq të çmuara siç kanë qenë gjithnjë”, ka thënë Princi Charles.

Ndërsa, kadeti më i mirë, oficeri Hoxha, tha se nuk është ndjerë asnjëherë më krenar, dhe i emocionuar. Kjo është një ditë e veçantë për mua. Ky titull është edhe një privilegj dhe obligim ma shumë që këtë ta dëshmojë me punë dhe angazhim më të madh, në të mirë të FSK-së dhe Kosovës.

Bashkë me oficerin Hoxha diplomuan edhe dy oficerë të FSK-së, Fitore Fazliu dhe Besfort Kruma, të cilat ndiheshin krenarë që ishin pjesë e kësaj ceremoni.

E veçanta e kësaj ceremoni ishte se flamuri i Kosovës ishte i pari nga të gjithë flamujt e shteteve tjera pjesëmarrëse në akademi,  e jo sipas alfabetit, siç ka ndodhur në ceremonitë e kaluara.

Në Akademinë Mbretërore Ushtarake Sandhurst në Britaninë e Madhe në Londër edhe më parë e kanë kryer oficerë të FSK-së, të cilët gjithmonë janë dalluar me performancën e tyre.

Në ceremonin e diplomimit të oficer-kadetëve të Akademisë Mbretërore Ushtarake ,,Sandhurst,,në Londër, e cila ka një traditë mbi 200 vjet,  u certifikuan 120 kadet, pas një shkollimi 12 muajsh.

Artikulli paraprakSi ta dini nëse keni nivele të larta të inteligjences emocionale
Artikulli tjetërGarë e fortë në LDK për kandidatin për kryetar të Prishtinës. Ja kandidatët potencial!