Llapi – Flamurtari, derbi i skuadrave në superformë

Një seri e fitoreve do të përfundojë të dielën kur në stadiumin “Zahir Pajaziti” në Podujevë do të takohen Llapi e Flamurtari.

Flamurtari është lider në Superligën e Kosovës në futboll më 12 pikë nga katër ndeshje. Llapi është i dyti me nëntë pikë, raporton Koha Ditore.

Dhe dy skuadrat kryesuese takohen në derbin e xhiros së pestë të kampionatit të Kosovës në futboll. Takimi nis në orën 15:45.

Flamurtari i Prishtinës, që edicionin e kaluar siguroi ekzistencën përmes barazhit, ka gëzuar nismë të furishme në edicionin 2018/19. Ka fituar rresht ndaj Ferizajt (1:0), Dritës (3:1), KEK-ut (1:0) dhe Lirisë (3:1).

Llapi nisi keq. Në hapje pësoi në shtëpi nga Drenica me shifrat 1:0. Por skuadra e Bylbyl Sokolit më pas nisi serinë e saj të fitoreve. Fitoi ndaj Ballkanit (3:0), Ferizajt (5:1) dhe Dritës (2:1). Kështu të dielën njëra prej serive të fitoreve do të përfundojë.(Më gjerësisht mund të lexoni sot në Koha Ditore).