Llapi e Dukagjini kërkojnë Kupën e parë dhe daljen në Evropë

Trajneri i Llapit, Tahir Batatina, është i vendosur për ta fituar Kupën e Kosovës në futboll. Madje, Batatina thotë se ky trofe ka vlerën e historisë jo vetëm për ekipin e Llapit, por për të gjithë futbollin llapjan.

Skuadra e Llapit të mërkurën prej orës 20:45 në stadiumin “Fadil Vokrri” në Prishtinë do të përballet në finale të Kupës së Kosovës me Dukagjinin, ekip që bën gara në Ligën e Parë.

Batatina ka insistuar se ekipi i tij është i gatshëm për këtë finale dhe për realizim të ëndrrës së tij, daljen në garat evropiane. Me triumfin në Kupën e Kosovës, Llapi automatikisht do të siguronte pjesëmarrjen në Ligën e Konferencës, garë e re e themeluar nga UEFA, që do të zhvillohet prej edicionit të ardhshëm. Për trajnerin e Llapit, ky është momenti i duhur dhe i fundit që ekipi i tij të sigurojë daljen në Evropë pas disa vjetësh tentimi.

Për Llapin kjo është finalja e dytë në Kupën e Kosovës. Të parën, atë të vitit 2018, Llapi e pati humbur nga Besa e Pejës dhe Batatina nuk beson se ajo histori do të përsëritet.

“Është e vërtetë që ky trofe është ëndërr e shumë legjendave të futbollit llapjan duke filluar nga Fadil Vokrri. Shumë gjenerata të arta që kanë flijuar për Llapin pothuajse një shekull, nuk kanë arritur trofe dhe tani e kemi rastin për ta bërë një gjë të tillë. Ky ***nuk është vetëm një trofe, por është më shumë histori e futbollit llapjan. Kështu që nëse arrijmë të fitojmë, atëherë do të jetë trofe historik për Llapin dhe ne do të dalim në fushë që këtë ëndërr ta bëjmë realitet”, ka paralajmëruar trajneri i Llapit, Batatina të martën për KOHËN.

“Jemi të qetë dhe pa presion, sepse deri në finale kemi ardhur me hapa të sigurt. Gjithashtu kemi përvojën dhe jemi maksimalisht të motivuar për triumf. Atmosfera në ekip është fantastike dhe kemi mbështetjen e kryesisë në çdo aspekt pasi na ka mundësuar kushte si për punë ashtu edhe për akomodim. Jemi gati për finalen e madhe, të kompletuar dhe të përgatitur në të gjitha aspektet”.

Ngjashëm sikurse Batatina, edhe trajneri i Dukagjinit, Armend Dallku, po synon ta shkruajë historinë. Dallku si trajner po e kërkon triumfin e dytë rresht në Kupën e Kosovës derisa të parin për Dukagjinin. Dallku edicionin e shkuar triumfoi në këtë garë me skuadrën e Prishtinës dhe tani po synon të njëjtën gjë edhe me Dukagjinin. Për Dukagjinin, kjo është finalja e tretë por që deri më tani asnjëherë nuk e ka ngritur trofeun.

Dallku, që mori drejtimin e Dukagjinit në fillim të këtij edicioni, thotë se po kthehet në stadiumin e njëjtë, në të cilin e fitoi trofeun edicionin e shkuar me Prishtinën, por tani me ngjyra të tjera. Ai shpreson që fati të jetë në anën e ekipit të tij dhe të arrij këtë sukses të madh. Duelin me Llapin, Dallku e ka vlerësuar si tejet të vështirë.

“Normalisht dëshira është e madhe për të triumfuar në kupë si nga ana ime ashtu edhe e futbollistëve, kryesisë dhe e gjithë qytetit të Klinës. Po shpresoj që do të jem fitues i këtij trofeu edhe këtë vit pasi vitin e shkuar e fitova. Ndoshta jam fatlum pasi do të luaj në të njëjtën stadium, por vetëm tani me ngjyra të tjera”, është shprehur Dallku. “Është ndeshje e rëndësishme për dy ekipet, ndonëse presioni është në anën e Llapit për shkak se ka vite që po e kërkon Evropën dhe nuk e ka arritur. Ne kemi pasur objektiva të tjera në fillim të sezonit por pasi kemi arritur në finale të Kupës, jemi maksimalisht të motivuar. Besoj se angazhimi i lojtarëve nuk do të mungojë sepse është finale dhe shpresoj ta kemi edhe fatin në anën tonë sepse në ndeshje të tilla është më se i nevojshëm”.

Si Batatina ashtu edhe Dallku kanë insistuar se skuadrat e tyre janë të përgatitura edhe nëse ndeshja do të zgjasë më shumë se 90 minuta dhe do të vendoset pas vazhdimeve apo me penallti.

Llapi aktualisht është i pesti në Superligë me 42 pikë, por matematikisht nuk e ka siguruar mbetjen në elitë. Ndërkohë Dukagjini është i dyti në Grupin A të Ligës së Parë dhe Superligën me shumë mundësi do ta kërkoj përmes barazhit.

Llapi deri në finale ka eliminuar Onixin. Ballkanin, Trepçën ’89 dhe Prishtinën. Kurse Dukagjini ishte më i suksesshëm se Vllaznia e Pozheranit, 2 Korriku, Drenica dhe Istogu. Madje Istogun e eliminoi vetëm me një ndeshje, kurse tjetrën e fitoi në tavolinë, për shkak të një lëshimi te istogasit.