Aksident në Bajçinë të Podujevës, lëndohen dy persona |Pamje
LDK ka hequr dorë nga posterët, jo nga billbordat dhe muralet
Lidhja Demokratike nuk ka hequr dorë nga billbordat dhe muralet. Koordinatorja për media e LDK’së, Doruntinë Maloku, ka shpjeguar se Shtabi Zgjedhor i kësaj partie ka vendosur që të mos praktikoj vetëm vendosjen e posterëve për fushatën zgjedhore të 22 tetorit. Thotë se e gjithë kjo është bërë për të racionalizuar shpenzimet, mbrojtjen e ambientit si dhe pronat publike e private.
Njoftimi i saj i plotë:
Shtabi Zgjedhor i Lidhjes Demokratike të Kosovës (LDK) në konsultim me kryetarët e degëve, rikujton strukturat, elektoratin dhe gjithë qytetarët, se ka vendosur që të mos praktikojë vendosjen e posterëve në fushatën e zgjedhjeve të 22 tetorit, me qëllim që të racionalizojë shpenzimet, të mbrojë ambientin, pronat publike dhe private.
Vendimi i Shtabit Zgjedhor të LDK-së, nuk ka të bëjë me vendosjen e billbordave dhe muraleve, sepse ato vendosen nga kompani profesionale dhe garantojnë heqjen e tyre pas përfundimit të fushatës zgjedhore, pa e dëmtuar pamjen e vendbanimeve dhe pa e ndotur ambientin.
Praktikat e zgjedhjeve të kaluara kanë treguar se posterët e të gjitha partive politike, janë vendosur nëpër vende joadekuate, në prona publike dhe private dhe kanë degraduar pamjen e lagjeve dhe qyteteve.
LDK-ja e ka prioritet mbrojtjen e mjedisit, kujdesin ndaj pronës publike dhe garantimin e pronës private, prandaj ky vendim kishte pikërisht këto qëllime.
Me qëllim të sqarimit të opinionit publik, vendosja e billbordave dhe muraleve nuk bie ndesh me vendimin e Shtabit Zgjedhor të LDK-së.
Lidhja Demokratike e Kosovës i fton edhe subjektet tjera politike që të kenë kujdes të shtuar ndaj mjedisit gjatë aktiviteteve të fushatës zgjedhore.
Shtabi Zgjedhor i Lidhjes Demokratike të Kosovës (LDK)./Express/