Ekskluzive: I dënuar me 4 muaj burgim për kanosje, ky është personi
Ky është grupi prej gjashtë të rinjve që u arrestuan për grabitjet e armatosura në pompa derivatesh
Grupi prej gjashtë personave të dyshuar për së paku pesë raste të grabitjeve të armatosura në pompa të derivateve në Lipjan dhe Drenas, ka rënë të shtunën në prangat e Policisë, pas një operacioni të zhvilluar në disa lokacione, raporton Gazeta Sinjali.
Të dyshuarit që u arrestuan për këto raste janë kryesisht të moshave të reja dhe dyshohet se duke vepruar bashkërisht janë përfshirë në raste të grabitjeve në pompa, raste këto të cilat kanë ndodhur në periudhën korrik-shtator 2022.
Burimet nga Prokuroria kanë bërë me dije ekskluzivisht për Sinjalin se gjashtë të arrestuarit për këto raste janë:
- A. 18-vjeçar
- D. 18-vjeçar
- Sh. 19-vjeçar
- Sh. 21-vjeçar
- M. 19-vjeçar
- Sh. 18-vjeçar.
Përveç tyre, gjatë këtij aksioni policor, është arrestuar edhe një person i dyshuar për armëmbajtje pa leje, por i cili është liruar për t’u hetuar në procedurë të rregullt.
Pjesë e operacionit ka qenë edhe kontrolli i vendbanimeve të tyre, ku janë gjetur dhe sekuestruar:
– një armë zjarri -AK 47
– një Pistolete- TT
– tre karikatorë
-48 fishekë
-30 paketime te vogla substancë e dyshuar narkotike (dyshohet marihuanë).
Armët dhe droga e sekuestruar
Gjashtë të dyshuarit e përfshirë në veprat penale si grabitje e armatosur, grabitje në tentativë, mbajtje në pronësi kontroll ose posedim i paautorizuar i armës, përdorimi i armës si dhe posedim ilegal i substancave narkotike, me urdhër të Prokurorit të Shtetit janë dërguar në mbajtje.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
