Kuvendi i Komunës së Podujevës me seancë solemne shënoi “Epopenë e UÇK-së”

Kuvendi i Komunës së Podujevës ka mbajtur seancë solemne, për nder të shënimit të “Epopesë së UÇK-së”, në të cilën kryetari i Komunës së Podujevës, Shpejtim Bulliqi, tha se sakrifica e familjes Jashari, është rasti ndoshta më unik në botë, ku për lirinë e atdheut të tyre, për tre ditë rresht do të luftonin dhe në fund do të flijoheshin tre breza të një familjeje të madhe.

Me një mbledhje solemne Kuvendi i Komunës së Podujevës ka shënuar 23 vjetorin e rënies së familjes Jashari – “Epopenë e UÇK-së”, ku përveç këshilltarëve, kryetarit të Komunës, anëtarëve të ekzekutivit, ishin të pranishëm edhe përfaqësues të institucioneve lokale dhe të shoqatave të dala nga lufta e UÇK-së.

Në hapjen e kësaj mbledhje, kryesuesi i Kuvendit, Fatmir Gashi, tha se më 5,6 dhe 7 mars të vitit 1998 do të fillojë epoka e çlirimit, epoka e lirisë.

“Këto tri ditë të heroizmit do të shndërroheshin në lavdinë e Jasharajve dhe Ushtrisë Çlirimtare të Kosovës, pas të cilës mijëra djem e vajza, burra e gra do të rreshtoheshin në luftën për çlirimin e vendit. Kjo betejë përcaktoi të ardhmen e popullit tanë të shumëvuajtur”, tha kryesuesi Gashi.

Kryetari i Komunës, Shpejtim Bulliqi, në fjalën e tij tha se duke shënuar “Epopenë e Ushtrisë Çlirimtare të Kosovës” shprehim nderimin dhe mirënjohjen tonë të thellë për veprën dhe sakrificën e jashtëzakonshme të komandantit legjendar Adem Jashari, familjes së tij, të gjithë dëshmorëve të kombit si dhe të gjithë të rënëve për lirinë e Kosovës.

“Beteja e 5, 6 dhe 7 marsit 1998 përcaktoi të ardhmen e shqiptarëve për një jetë të re dhe të lirë. Një ditë që komandanti legjendar Adem Jashari me rënien e tij dhe familjes së tij e bëri realitet. Asnjë vepër nuk mund të krahasohet me rënien e tij për liri”, tha kryetari Bulliqi.

Kryetari Bulliqi tha se me luftën dhe rënien e Jasharjave, UÇK-ja u rrit në përmasa gjithkombëtare, diplomacia botërore u vu në anën e luftës së drejtë të shqiptarëve.

“Kujtimi për sakrificën e Familjes Jashari, na udhëzon për punë të mira, për ecje të drejtë dhe na e përkujton se rruga jonë duhet të jetë rrugë e forcimit të Republikës së Kosovës, tha kryetari Bulliqi.

Fjalën e tij në këtë mbledhje solemne, kryetari Bulliqi e përmbylli, me një thënie të administratorit të parë ndërkombëtar të Kosovës, Bernard Kouchner, për familjen Jashari dhe Prekazin: “Bota filloi lëvizjet pikërisht prej Prekazit. U bëmë të vetëdijshëm për një realitet të sakrificave dhe luftimeve që u bënë këtu.  Sikur të ketë Çmim Nobel të Lirisë, ai i takon Familjes Jashari”.

Kryetari i OVL të UÇK në Podujevë, Fahri Balaj, duke folur në këtë seancë solemne tha se rezistenca e familjes Jashari shkoi deri ne flijim dhe kjo na obligon të punojmë më shumë për vendin tonë.