Kush do ta fitojë Podujevën?! Të tre kandidatët e shohin vetën fitues (VIDEO)

Subjektet politike me kandidatët e tyre për kryetarë komune në Podujevë janë të gatshëm për zgjedhjet e jashtëzakonshme të datës 29 nëntor 2020, datë kjo e cila u caktua nga shefi i shtetit, Hashim Thaçi.

Edhe për Shemsi Jasharin, drejtues i organizatës jo-qeveritare “Demokracia Fillon Këtu”, një vendim i tillë do të duhej të ndodhte më herët.

Veç se pandemia, për njërin nga kandidatët e kësaj gare politike, Nexhmi Ruadrin, mund të ndikojë në daljen e qytetarëve për të votuar. Përkundër kësaj, ai beson në fitore të bindshme.

“Nuk ndihem i rrezikuar dhe do të fitojë pa balotazh subjekti im dhe unë si kandidat”, tha Rudari.

Kurse për kandidatin nga radhët e LVV-së, Shpejtim Bulliqi, Podujeva do të frymojë lirshëm me 29 nëntor.

“Do ta kthejmë rendin dhe kontrollin në administratë, kjo në dobi të qytetarëve dhe këto projekte që janë në vazhdimësi do t’i monitorojmë”, theksoi Bulliqi.

Përveç këtyre, në zgjedhjet e 29 nëntorit do të garojë edhe PDK-ja me kandidatin e tyre Naim Fetahun.

Ai ka thënë se “rruga drejt fitores na u nderpre në muajin Mars, për shkak të pandemisë COVID-19, por tani më fitorja jonë nuk ka dilema”.