Kurti flet pas takimit me Lajçak: Dialogu s’është prioriteti i parë ose i dytë

Kryetari i Lëvizjes Vetëvendosje, Albin Kurti, ka dhënë detaje për takimin e zhvilluar sonte në zyret e partisë së tij me Përfaqësuesin Special të BE-së, Miroslav Lajçak, për dialogun Kosovë-Serbi.

Kurti tha se Lajçak e informoi për procesin e dialogut në përgjithësi, por se i ka thënë se programi i VV-së përqendrohet te drejtësia dhe punësimi.

“Më informoi me procesin e dialogut në përgjithësi. Unë shpjegova edhe një herë që ne i kemi fituar këto zgjedhje me programin tonë që përqendrohet te drejtësia dhe punësimi, se jemi në kushtet e pandemisë COVID-19, dhe se nuk jemi kundër dialogut, por e duam parimor dhe të përgatitur mirë”, ka deklaruar Kurti pas takimit me Lajçak.

Ai ka thënë se nuk e mohon rëndësinë e dialogut, por se nuk është prioritet i parë ose i dytë.

“Nuk mund të jetë prioriteti i parë ose i dytë, sepse janë drejtësia dhe punësimi. Nuk e mohoj rëndësinë e dialogut – edhe për BE-në, Kosovën dhe Serbinë dhe rajonin, por më e rëndësishmja është që ky dialog të jetë i përgatitur mirë. Të jetë dialog i sinqertë në të cilin nuk jemi në presionin e kohës, por jemi me përkushtimin për substancë”, deklaroi Kurti.