KUJDES: Policia në Podujevë ka shqiptuar 174 gjoba për një javë për mos respektim të masave anti-covid

Shtabi Emergjent i Komunës së Podujevës ka mbajtur takim për veprime dhe masa parandaluese nga Covid-19, në të cilin ka shqyrtuar gjendjen aktuale me pandeminë, respektimin e masave mbrojtëse dhe rikthimin në zonën e kuqe.

Në takimin e sotëm të Shtabit Emergjent, të udhëhequr nga nënkryetarja e Komunës, Marigona Lahu, u diskutua për situatën e përgjithshme epidemiologjike në Komunën e Podujevës, pas shtimit të rasteve me të infektuar dy javët e fundit dhe kategorizimin e ri të komunave, ku Komuna e Podujevës nga sot bënë pjesë në zonën më rrezikshmëri të lartë.

Lidhur me gjendjen me pandeminë Covid-19, epidemiologia Bedrie Rama, tha se situata është e menaxhueshme edhe përkundër shtimit të numrit të rasteve dy javët e fundit. Ajo tha që deri tani në Komunën e Podujevës janë infektuar 3399 persona, ku 3104 janë shëruar, 248 persona janë aktiv me virus, si dhe 47 persona kanë përfunduar me fatalitet, vdekje. Epiedemiologia Rama ndau informatën që nga java  e fundit në Qendrën Anti-Covid në QKMF kanë filluar me teste të shpejta(rapide), që do të thotë pacientët do të kenë mundësinë që rezultatet e tyre t’i marrin pas 15-20 min.

Shefja e sektorit të operativës nga Stacioni i Policisë, Valbona Blakçori, tha se janë duke zbatuar planin operativ në përputhje me Ligjin anti-Covid. Ajo tha se vetëm nga java e kaluar janë shqiptuar 174 gjoba për mos respektim të masave anti-covid qoftë nga bizneset apo personat të cilët nuk kanë bartur maska. Blakçori theksoi bashkëpunimin e mirë me drejtorinë e Inspeksionit dhe punën e tyre të përbashkët në zbatimin e planit të veprimit.

Drejtori i Drejtorisë së Arsimit, Avni Fetahu, foli për respektimin e masave anti-Covid nëpër shkolla, ai tha që duke u bazuar në vizitat e kësaj drejtorie brenda objekteve shkollore kemi respektim të masave në bartjen e maskave dhe masave të tjera anti-Covid. Poashtu prezantoi edhe një rekomandim që po bëhet në nivel të komunave të Kosovës për nxënësit e klasave 1-5, që sipas këtij rekomandimi është e domosdoshme pas pushimit një javor të shkollave me këtë cikël të klasave të punohet çdo ditë, pasi që cilësia e mësimit të këtij cikli të nxënësve ka rënë për 50 %.

Shtabi Emergjent edhe sot bëri apel te qytetarët të respektojnë masat anti-Covid, pasi që gjendja është duke u rënduar dhe rastet po shtohen çdo ditë e më shumë, dhe si rezultat i kësaj situate kapacitetet mjekësore vijnë duke u rënduar.