Konjufca jep detaje për keqpërdorimet në AKI

Shefi i grupit parlamentar të Levizjes Vetëvendosje, Glauk Konjufca ka thënë se auditori i Agjencisë Kosovare të Inteligjencës, Naim Ibrahimaj është suspenduar nga detyra për shkak se ka zbuluar se në AKI-i, janë keqpërdorur 246 mijë euro, dhe janë punësuar pa test dhe pa konkurs 8 persona në AKI.

Ai tha se qeverisja s’ka të bëjë me vlerat evropiane, pasi ajo çka ka ndodh në AKI, tregon se çka po ndodh në Kosovë me të vërtetë.

“Para pak ditësh e kemi pas atë që në opinion u quajt dorëheqja e drejtorit të AKI-së. Por kjo ngjarje ka mbuluar një ngjarje më të rëndësishme, qëllimi ka qenë shkarkimi i Selimajt. Në AKI ka ndodh diçka që nuk është bërë publike, s’ka qenë temë e lajmeve. Dua ta ngris si problem për ta kuptuar defektin si qeveriset Kosova. Ekziston një proces i auditimit të AKI-së, këtë e ka udhëheq Naim Ibrahimaj, një qytetar i mirë i Kosovës, auditor profesional i vendit tonë, një patriot që donë vendin e vet e që donë me krye detyrën pa ndikime është suspenduar para pak dite prej kësaj qeverie. Ai u suspendua sepse në AKI i ka zbuluar tri gjëra shumë të rrezikshme për këtë qeverisje të keqe. Çka paska zbulu, ka zbulu që në AKI janë keqpërdor 246 mijë euro. Një raport kofidencial që ia ka dërguar Thaçit dhe Isa Mustafës. Pranimi i 8 personave në AKI pa kurrfarë testi dhe konkursi. Je militant partiak shkon drejtpërdrejtë, të fusin në intelegjencë, për t’i kryer shërbimet partiake”, tha ai.

Ai shpjegoi se pas kësaj kryeministri dhe presidenti e shkarkojnë drejtorin e AKI-së dhe suspendojnë auditorin Ibrahimaj.

“A qohet ndokush në këtë vend me mbrojt Naim Ibrahimin. Ai që tregon të vërteten qohet në shtëpi, shantazhet dhe kërcënohen. Këto janë vlerat evropiane të Kosovës”, tha ai./Gazeta Blic/