Komuna e Podujevës shpërndau kontratat për përfituesit e puseve të ujit

Në kuadër të  memorandum bashkëpunimit të nënshkruar javë më parë mes Komunës së Podujevës dhe Organizatës “Qatar Charity” , sot u bë shpërndarja e kontratave për 55 përfituesit e puseve familjare për furnizim me ujë të pijes, thuhet në njoftimin e zyrës për informim, transmeton PodujevaPRESS.

Shpërndarjen e kontratave e bëri kryetari i Komunës së Podujevës, Shpejtim Bulliqi bashkë me përfaqësuesin e organizatës “Qatar Charity”.

Kryetari u shpreh  lumtur për realizimin e kësaj marrëveshje ku tha se “Uroj dhe shpresoj që përmes këtyre puseve do të bëjmë zgjidhjen e juaj për ujë, që është jetike për familje, ne do të vazhdojmë që me projekte të tilla të ju përkrahim dhe t’ua lehtësojmë jetesën gjithë qytetarëve që ballafaqohen me këtë problem” dhe njëherit uroi të gjithë përfituesit.

Kryetari Bulliqi falënderoi përfaqësuesin e organizatës, “Qatar Charity”, për bashkëpunimin e vazhdushëm me Komunën e Podujevës dhe për donacionin në fjalë që ndikon drejtpërdrejt në përmirësimin e mirëqenies së qytetarëve.

Në kuadër të këtij memorandumi, do të bëhet hapja e puseve në vende të ndryshme të komunës, ndërsa përfituesit janë familjet me kushte më të rënda ekonomike.