Komuna e Podujevës nënshkruan marrveshje për ngritjen e kujdesit shëndetësor shtëpiak

Komuna e Podujevës sot ka nënshkruar një marrveshje katër palëshe me qëllim të ngritjes së kujdesit shëndetësor shtëpiak, shkruan PodujevaPRESS.

Komuna e Podujevës, Ministria e Shëndetësisë, Ministria e Punës dhe Mirëqenies Sociale (MPMS) dhe Caritas Kosova kanë nënshkruar Marrëveshjen e bashkëpunimit dhe bashkëfinancimit, për projektin ”Ngritja e përkujdesit shëndetësor shtëpiak dhe ambulantor (Home Care) në Komunën e Podujevës”.

Ky projekt kap shifren e 115,186.40 euro, ku komuna e Podujevës do të participojë me 19,746.40 euro, MSH dhe MPMS me nga 40,000.00 euro (80.000 së bashku) dhe “Caritas Kosova” do të participojë me shërbime profesionale, pajisje dhe shërbime menaxheriale në vlerë prej 15,440.00 euro.

Ky projekt i cili do të zgjasë 6 muaj, nga 15.02.2017 deri me 15.08.2017, ka për qëllim ngritjen e përkujdesit shëndetësor shtëpiak dhe ambulantor (Home Care) në Komunën e Podujevës si dhe të ndihmohet QKMF në realizimin e vizitave për të gjithë pacientët që e marrin mjekimin në shtëpi; të gjithë ata pacientë të cilët për arsye të ndryshme shëndetësore nuk kanë mundësi që t’i vizitojnë objektet e QKMF-së

Marrëveshja është nënshkruar në ambientet e Ministrisë së Shëndetësisë, nga Kryetari i Komunës së Podujevës, Agim Veliu, ministrat Imet Rrahmani e Arban Abrashi dhe drejtori Gjeneral i ‘Caritas Kosova’, Don Viktor Sopi.

Njoftim është bërë në faqen zyrtare të komunës së Podujevës./PodujevaPRESS/