Komuna e Podujevës ka punësuar 9 persona pa zbatuar një procedurë të thjeshtësuar për rekrutimin

Auditori i përgjithshëm në publikimin e raportit për Komunën e Podujevës flet për shumë shkelje dhe menagjim të keq të buxhetit, transmeton PodujevaPRESS.net

Njëra prej tyre është edhe kur Komuna e Podujevës kishte angazhuar nëntë persona përmes marrëveshjeve për shërbime të veçanta për të cilët nuk ishte zbatuar një procedurë e thjeshtësuar e rekrutimit.

Ja çfarë shkruan në raport:

Çështja B1 – Mangësi tek kontratat për shërbime të veçanta

Gjetja

Sipas neni 10 të Ligjit të Punës Nr. 03/L-212, kontrata për një detyrë specifike, nuk mund të jetë më e gjatë se njëqindenjëzet (120) ditë brenda një (1) viti dhe sipas nenit 12, pika 4, të Ligjit nr.03/L-149 për Shërbimin Civil, emërimet me afat të caktuar për një periudhë më të shkurtër se gjashtë (6) muaj do të bëhen në bazë të kontratave të quajtura “Marrëveshje për shërbime të veçanta” të cilat i nënshtrohen Ligjit për Detyrimet dhe për të cilat zbatohet një procedurë e thjeshtësuar e rekrutimit.

Komuna kishte angazhuar 30 persona me kontrata për punë dhe detyra specifike, ku 23 prej tyre punonin për periudhën kohore më të gjatë se katër (4) muaj brenda një viti.

Po ashtu, kishte angazhuar nëntë persona përmes marrëveshjeve për shërbime të veçanta për të cilët nuk ishte zbatuar një procedurë e thjeshtësuar e rekrutimit.

Zyrtarët punonin, si infermierë, zyrtar për të dhëna, roje, punëtorë teknik, etj. Këto pozita konsiderohen si pozita të rregullta të punës e jo si detyra specifike siç janë cilësuar nga ana e komunës.

Sipas komunës kjo ishte pasojë e mungesës së pozitave të aprovuara në planifikimin e buxhetit, mirëpo komuna ka pasur të aprovuar me ligjin e buxhetit 1,980 pozita, ndërsa në fund të vitit numri i të punësuarave ishte 1,921 në PVF-ve të komunës.