Klinika Infektive e liron 85-vjeçarin nga Podujeva, nuk e riteston për COVID-19

Një 85-vjeçar nga Podujeva është liruar gjatë ditës së sotme nga Klinika Infektive në QKUK, pasi gjendja e tij shëndetësore ishte përmirësuar.

Kështu ka bërë të ditur për Gazetën Sinjali, epidemiologia Bedrie Rama, e cila ka thënë se i njëjti nuk është ritestuar për koronavirus, por vetëm është liruar nga Klinika Infektive.

“Një person 85-vjeçar është liruar nga Klinika Infektive gjatë ditës së sotme. I ka afro 20 ditë që është duke u trajtuar. Ka qenë në gjendje të rëndë, por është liruar nga klinika, mirëpo nuk është ritestuar që me u shpallë i shëruar”, ka thënë Rama.

Personi i parë që ka vdekur nga koronavirusi në Kosovë ka qenë një burrë i moshuar nga Komuna e Podujevës, saktësisht nga fshati Dumnicë e Epërme.