Kështu duken rrugët e zbrazëta të qytetit të Podujevës | FOTO
Podujeva pas vendimit të Ministrisë së Shëndetësisë për shtrëngimin e masave edhe sot është parë bosh dhe e qetë, njofton portali PodujevaPRESS.net
Në bazë të fotografive shihet se llapjanët po qëndrojnë të mbyllur në shtëpitë e tyre dhe ka fare pak qarkullim në qytet. Nëpër rrugët e qytetit sheh shumë pak vetura ose njerëz.
Qeveria e Kosovës ka miratuar dje masat e reja të mbrojtjes nga pandemia COVID-19, të propozuara nga Ministria e Shëndetësisë, ku ndalohet veprimtaria disa subjekteve afariste dhe bizneseve.
Sipas këtij vendimi, puna gjatë kësaj fundjave u lejohet vetëm: furrave të bukës, barnatoreve, marketeve të vogla, pompave të derivateve.
Do të vazhdojnë edhe shërbimet edhe institucionet shëndetësore publike dhe private për nevoja mjekësore, prodhim, furnizim dhe shitje të mallrave esenciale.
“Për shërbime dhe aktivitete që ndërlidhen me menaxhimin e COVID 19 (menaxhmenti dhe personeli esencial qeveritar dhe komunal në sektorët e shëndetësisë, sigurisë dhe administratës shtetërore). Operatorët ekonomik dhe transporti i lirë i mallrave/shërbimeve për të siguruar funksionimin e furnizimit”, thuhet në njoftim.
Ndërkaq, ndalohet veprimtaria e të gjitha subjekteve afariste dhe bizneseve, qendrave tregtare e rekreative, supermarketeve, subjekteve që ofrojnë shërbimet e gastronomisë (restorantet, kafiteritë dhe të ngjashme) në tërë territorin e Republikës së Kosovës, prej orës 20:00, më 06/11/2020 (e Premte) deri më 09/11/2020 (e Hëne) në orën 05:00.