Kandidatët dyshojnë se shkaku i pandemisë zgjedhjet në Podujevë mund të shtyhen sërish

Në kohën kur institucionet kanë paralajmëruar rritjen e numrit të të infektuarve me koronavirus shkaku i valës së dytë të pandemisë, presidenti Hashim Thaçi ka shpallur zgjedhjet e jashtëzakonshme në dy komuna, Podujevë e Mitrovicë të Veriut. Përmes një njoftimi për media Zyra e presidentit ka bërë të ditur se ato do të mbahen më 29 nëntor derisa ka kërkuar nga KQZ-ja që të ndërmarrë të gjitha veprimet e nevojshme për organizimin e tyre.

“Organizimi dhe mbajtja e zgjedhjeve për kryetar të Komunës së Podujevës dhe për kryetar të Komunës së Mitrovicës së Veriut duhet të bëhet në koordinim dhe bashkërendim me institucionet përkatëse, në pajtim me Ligjin nr. 07/L-006 për Parandalimin dhe Luftimin e Pandemisë COVID-19 në territorin e Republikës së Kosovës”, thuhet ndër tjerash në njoftimin e Presidencës.

Dy komunat kanë mbetur pa kryetarë qëkur Agim Veliu i Podujevës dhe Goran Rakiqi i Mitrovicës së Veriut morën udhëheqjen e dikastereve në Ekzekutiv. Veliu u bë ministër i Punëve të Brendshme në Qeverinë Kurti, por më 18 mars u shkarkua, për t’u emëruar sërish në të njëjtin post në Qeverinë Hoti. Kurse Rakiqi është emëruar zv.kryeministër e ministër i Pushtetit Lokal me marrjen e udhëheqjes së Qeverisë nga Avdullah Hoti. Nga Komisioni Qendror Zgjedhor kanë bërë të ditur se me marrjen e dekretit të Thaçit kanë nisur procedurat për organizimin e planit operativ për mbajtjen e zgjedhjeve. Por për dallim, për ato të Podujevës, KQZ-ja nuk ka para për organizimin e zgjedhjeve në Mitrovicën e Veriut. Zëdhënësi i KQZ-së, Valmir Elezi, në një konferencë për media, ka thënë se për një gjë të tillë do t’i drejtohen Ministrisë së Financave. “Sa u përket zgjedhjeve të jashtëzakonshme për kryetar të Mitrovicës së Veriut, KQZ-ja do të dërgojë gjatë këtyre ditëve një kërkesë buxhetore në Ministrinë e Financave, pra ku do të kërkojë buxhet për të organizuar këto zgjedhje, sepse janë zgjedhje që nuk janë të planifikuara për këtë vit dhe rrjedhimisht duhet një kërkesë e re buxhetore në mënyrë që të mund të mbahen ato ”, ka thënë Elezi

Artikullin e plotë mund ta lexoni në gazetën Koha Ditore.