Ish i burgosuri politik dhe veprimtari i çështjes kombëtare Hajredin Hyseni publikon poezin për Ali Ajetin të cilën e kishte shkruar në burg

Veprimtari i çështjes kombëtare dhe i burgosuri politik, Hajredin Hyseni –Dini, ka publikuar sot një poezi të cilën ai e kishte shkruar në burgun e Dubravës në vitin 1995, kushtuar heroit të kombit Ali Ajeti, transmeton PodujevaPRESS.net

Kujtojmë se sot është 32 vjetori i rënjes së drejtuesit të “Çetës së Llapit” Ali Ajeti.

Kjo është poezia e tij:

Me Rastin e 32 vjetorit të rënies!

Ura e Lirisë

Ali Ajeti

Sa herë vjen Pranvera,

Kujtoj si gdhiu atë mëngjes Qyteti,

Me emrin Kosovë

Mbiemrin Republikë

Të shkruar në urën mbi rrugë,

Që të qon në Toplicë.

Si u bë emri e mbiemri një,

Si Lumi Llap gurgullonte pa nda,

Sa gëzoheshim ne,për emrin e ri

Dhe e ndanim këtë emër

Shtëpi më shtëpi!

Pastaj uturima e xhipave

Me xhambazët në të,

Si e ndiqnin emrin

Në shesh e rrugë kudo,

Shpërdanin mjegull,tmerr e lemeri

Po më i dashur,bëhej emri i ri !

Mburojë me flamur,dole ti

Dhe një u bëre me emrin e ri!

Sa herë të vie Pranvera

Ne të kujtojmë Ty

Se s’ka pranverë të vërtetë

Pa emrin që deshe Ti!

Dhe mbi qiellin e Kosovës

Shqiponjë mbete Ti!

Emri ishte jeta,

Përjetësi,mbete Ti.

Shkruar në vitin 95′ burgu i Dubravës