Institucioni kryesor shëndetësor në Podujevë me staf më të vogël se në vitet ‘90

Me mungesë stafi është duke u përballur që nga paslufta institucioni kryesor shëndetësor në Podujevë. Megjithëse janë shtuar shërbimet në Qendrën Kryesore të Mjekësisë Familjare (QKMF), numri i punonjësve shëndetësorë është për 30 veta më i vogël në krahasim me vitet ‘90.

Aktualisht kjo Qendër i ka 246 punëtorë shëndetësorë, ndërkohë që para rreth 30 vjetëve i kishte 276. Zyrtarët e këtij institucioni disa herë kanë thënë se mungesa e stafit mjekësor ua vështirëson punën për të ofruar shërbime cilësore, shkruan  “Koha Ditore”.

E partitë opozitare thonë se barra bie mbi qeverisjen lokale, që, sipas tyre, asnjëherë nuk e kishte prioritet këtë sektor. Kryetari i Qendrës së LVV-së në Podujevë, Bajram Ajeti, thotë se shërbimet shëndetësore nuk janë në nivelin e duhur.

“Në bazë të informacioneve, jo që nuk është në nivelin e ofrimit të shërbimeve të përcaktuara, me nenin 18 të Ligjit mbi shëndetësinë si Qendër Kryesore të Mjekësisë Familjare, por edhe në dy qendrat e tjera që janë si shërbime të shtrira të QKMF-së nuk janë në nivelin dhe nuk u ofrohen shërbime qytetarëve”, ka thënë Bajram Ajeti