Gruaja ndalon vetë Policinë në mes të rrugës – Denoncon bashkëshortin për dhunë fizike dhe kanosje

Numri i rasteve të dhunës në familje në vendin tonë ka marrë përmasa shqetësuese. Çdo ditë raportohen ngjarje të tilla ku viktima zakonisht janë gratë dhe vajzat që përjetojnë dhunë psikike e fizike kryesisht nga bashkëshortët e tyre, raporton Gazeta Sinjali.

Sinjali mëson për një rast të rëndë të dhunës në familje që ka ndodhur dje, rreth orës 20:30, në rrugën “Fatime Sokoli” afër rrethrrotullimit të Gardenit në Prishtinë, ku një grua ka raportuar se është kanosur dhe sulmuar fizikisht nga bashkëshorti i saj teksa ishin duke lëvizur me veturë.

Sipas burimeve të Sinjalit, viktima A.G., rreth 36-vjeçar ka ndalur vetë një veturë patrulle të Policisë, duke kërkuar ndihmë. Ajo ka deklaruar se pas një mosmarrëveshjeje verbale, bashkëshorti i saj, S. G., rreth 44-vjeçar, e kishte kanosur dhe goditur fizikisht, duke i shkaktuar lëndime për të cilat ka marrë tretman mjekësor në stacionin policor.

Gjatë intervistimit në stacionin policor, ajo ka theksuar se ndjehet e rrezikuar nga bashkëshorti dhe ka kërkuar urdhër mbrojtjeje, por nuk ka pranuar të strehohet në strehimore.

Pas koordinimit me Prokuroren kujdestare, është marrë vendim që: Viktima të kthehet në banesë me dy fëmijët, i dyshuari të largohet përkohësisht, duke marrë gjësendet personale.

Ndaj të dyshuarit është iniciuar rast për veprën penale “Dhuna në Familje”, e cila do të trajtohet në procedurë të rregullt.