Gjykimi për ndërtimin e shkollës në Podujevë, dy të aku.zuar për korrupsion

Të mërkurën, në Gjykatën Themelore në Prishtinë, është dhënë fjala hyërse, në rastin e dy të akuzuarve për vepra penale që lidhen me korrupsionin.

Në këtë rast, Musa Shala, në cilësinë e zyrtarit të inspektimit të projekteve, përkatësisht projekt-menaxher në Ministrinë e Arsimit, Shkencës dhe Tenkologjisë, akuzohet për keqpërdorim të pozitës zyrtare si dhe marrje ryshfeti.

Kurse, Mustafë Musatafa, në cilësinë e bashkëpronarit, përfaqësues ligjor dhe drejtor i kompanisë “Ndërtimtari”, akuzohet për keqpërdorim të pozitës zyrtare.

Gjykimi po zhvillohet në bazë të aktakuzës së Prokurorisë Themelore në Prishtinë, me të cilën dy të akuzuarit ngarkohen se këto vepra i kanë kryer lidhur me tenderin për ndërtimin e shkollës së mesme në Podujevë, në tetor të vitit 2009.

Në fjalën e tij hyrëse, prokurori Feti Tunuzliu ka thënë se dyshimi se të akuzuarit kanë kryer veprat penale është i ngritur mbi bazën e provave materiale prej numrin 1 deri në 123 të propozimit të paraqitur në këtë aktakuzë që të administrohen gjatë shqyrtimit gjyqësor.

“Detajet konkrete të këtyre veprave penale janë përshkruar në pikat 1 dhe 2 të dispozitivit të kësaj aktakuze e që kanë të bëjnë me dosjen e tenderit të MASHT numër 09099511 të shpallur me 14 gusht 2009 me titullin “Ndërtimi i objektit të shkollës së mesme”, shpallur nga autoriteti kontraktues, ndërsa si punëkryes ka qenë SH.P.K “ Ndërtimtari”, ka thënë ai.

Avokati i Musa Shalës, Gani Asllani ka thënë se prokurori gjatë përpilimit të aktakuzës të mbrojturin e tij, e ka ngarkuar për marrje të ryshfetit, ndërsa Nysret Berishën, i cili ka qenë dhënës i ryshfetit e ka liruar dhe nuk e ka akuzuar si kryes të veprës penale.

“Ndërsa, njëkohësisht dhënësin e ryshfetit, nuk e ka akuzuar edhe për kallëzimin e veprës penale sepse në momentin kur dhënësi i ryshfetit Nysret Berisha ka dhënë ryshfet për kryerjen e ndonjë pune apo ndonjë interesi, e ka ditur se është duke u kryer vepër penale”, ka thënë ai.

Sipas tij, si është e mundur që klienti i tij të kryej keqpërdorim të pozitës për një çështje në të cilën nuk ka qenë i involvuar pasi që siç ka thënë ai, sipas kontratës të punës në autoritetin kontraktues apo në MASHT, i njëjti ka qenë me titull të pozitës “zyrtar i inspektimit të projekteve”.

Sipas tij, gjatë shqyrtimit të kësaj çështje do të vërtetohet se i mbrojturi i tij nuk ka kryer asnjë nga veprat penale që e ngarkohen aktakuza.

Kurse, avokatja e Mustafë Mustafës, Leonora Dervisha ka thënë se besojnë se do të vërtetohet gjendja faktike që do të jetë në favor të mbrojturin të saj.

“Gjithashtu, do të vërtetohet se kontrata e lidhur mes operatorit ekonomik “Ndërtimtari” dhe operatorit tjetër për ndërtimin e shkollës në Podujevë nuk ka pasur tejkalim si thuhet në aktakuzë”, ka thënë ajo.

Sipas saj, do të paraqesin prova dhe dëshmitarë që do të vërtetojnë dhe dëshmojnë se kontrata e cila është objekt i aktakuzës nuk është përmbushur asnjëherë nga nënkontraktorët.

“Për këtë arsye ne si mbrojtje konsiderojmë se kjo kontratë e ndërtimit nuk mund të konsiderohet ashtu si është përshkruar në aktakuzë se e njëjta ka tejkaluar 40% të vlerës totale të kontratës “, ka thënë ajo.

Në këtë seancë, janë dëgjuar edhe disa dëshmitarë.

Ish-drejtori i prokurimit në ish-Ministrinë e Shërbimeve Publike (MSHP), Xhemajl Buzuku, ka deklaruar se problemi me tenderin për ndërtimin e një shkolle të mesme në Podujevë kishte qenë se ishte premtuar lejimi i të gjitha mjeteve, e më pas nuk ishin dhënë të gjitha.

“Problemi me këtë tender ka qenë se me vitin 2009 na është premtuar se do të lejohen të gjitha mjetet për të gjitha kontratat, ndërkaq për shkak të prioriteteve të qeverisë nuk na janë dhënë te gjitha mjetet dhe kjo na ka sjell problem në realizimin e të gjitha kontratave”, ka thënë ai.

Ai ka thënë se këtë problem nuk e kishin pasur vetëm për tenderin në fjalë, por edhe të tjera.

Sipas tij, në fund të vitin 2009, u janë kërkuar kontratat si dëshmi për Ministrinë e Financave për ndarjen e mjeteve dhe kanë ndarë sasi jo të mjaftueshme.

Ai ka thënë kanë dal probleme jo vetëm te operatorët ekonomikë, por edhe te ata si ministri.

Duke u përgjigjur në pyetjet e prokurorit Feti Tunuzliu, ai ka thënë se i kujtohet se Ministria e Arsimit, Shkencës dhe Teknologjisë (MASHT), në vitin 2009 ka shpallur tenderin në fjalë

“Në lidhje me këtë tender, në momentin kur është bërë tenderi publik kam qenë në pushim vjetor, kur është bërë hapja dhe vlerësimi i tenderit kam qenë në punë”, ka thënë ai.

Tutje, ka thënë se komisionin e hapjes e cakton drejtori i prokurimit në bashkëpunim me të tjerët dhe këtë veprim e kam ndërmarr ai

“Vendimi për komisionin e vlerësimit merret në bashkëpunim me njësinë kërkuese në bashkëpunim me sekretarin”, ka thënë ai.

Sipas tij, drejtori i prokurimit është i obliguar të nënshkruaj edhe raportin e hapjes edhe të vlerësimit dhe kështu ka vepruar, si dhe nënshkrimin e kontratës pas vlerësimit të komisionit.

“A ke qenë i kyçur më në këtë proces pas nënshkrimit të kontratës?”, ka pyetur prokurori Tunuzliu.

“Në menaxhim të kontratës nuk kemi qenë, sa i përket pagesave është një procedurë e gjatë derisa vjen në prokurim. Pjesërisht kam qenë i kyçur në pjesën e pagesave”, ka thënë dëshmitari.

Në këtë gjykim dëshminë e tyre e kanë dhënë edhe katër dëshmitarë tjerë.

Arberita Tafilaj, ka thënë se në vitin 2009, ka qenë e punësuar në MASHT si zyrtare e lartë e prokurimit.

Për tenderin në fjalë, ka thënë se sa i kujtohet ka qenë prezente në hapje të tenderit, por jo edhe në procedurat e tjera.

Sipas saj, zyrtarët e prokurimit në hapje të tenderit, i cakton menaxheri i prokurimit.

Sipas dijenisë së saj, ajo vetëm ka prezantuar në hapjen publike të tenderit me leximin e çmimeve.

Ka thënë se nuk i kujtohet se a ka qenë anëtare apo kryetare e komisionit.

Ajo ka thënë se hapja e tenderit është atë ditë kur është caktuar data në njoftim për kontratë.

“Në ditën kur kam qenë e informuar se jam caktuar në komision është bërë hapja”, ka thënë ajo.

Sipas saj, hapja e tenderit është bërë në MASHT dhe me sa i kujtohet në sallë pasi ka pasur shumë oferta.

“Vetëm kam hapur ofertat dhe kam lexuar çfarë çmime kanë ofruar operatorët”, ka thënë ajo kur është pyetur se çfarë veprime marr.

Tutje, ka thënë se është mbajtur procesverbal dhe se i njëjti është printuar dhe u është dhënë të gjithë operatorëve, kurse origjinali mbetet pjesë e lëndës dhe dorëzohet te menaxheri i prokurimit.

Valon Alimusa, ka thënë se ka punuar si zyrtar i prokurimit në MASHT në vitin 2009 dhe se ka qenë i angazhuar në procedurën e tenderimit të tenderit në fjalë, sipas vendimit të ZKA.

Ai ka thënë se kanë bërë vlerësimin e tenderëve në bazë të kritereve të përcaktuara në dosje të tenderit dhe se për çdo veprim kanë bërë raportin e vlerësimit.

Ai ka thënë se si komision bëjnë rekomandimin dhe kanë rekomanduar operatorin ekonomik “Ndërtimtari”, pasi sipas tij, ka plotësuar kriteret e kërkuara.

“A kishit dijeni ajo pjesë e ofertës se operatorit ekonomik se ai ne mungesë të kapaciteteve për ndërtimin e shkollës do të angazhonte nënkontraktor?”, ka pyetur prokurori Tunuzliu.

“Nuk kam qenë në dijeni sepse më tender është paraqitur si ofertues i vetëm”, ka thënë ai.

Tutje, dëshmitari Islam Shoshi, ka thënë se është bashkëpronar i kompanisë “Menti ” SH.P.K. .

Ai ka konfirmuar deklaratën e tij në polici ku kishte thënë se operatori ekonomik që ka ofertuar për ndërtimin e shkollës në Podujevë ka plotësuar kushtet.

Sipas tij, arsye pse kompania e tij nuk e ka fituar tenderin, ka qenë se çmimi i tij ka qenë shumë i lartë.

Dëshmitari Afrim Demiri, ka thënë se në 2009 ka qenë bashkëpronar i kompanisë “Architect”, ku është edhe tani.

Ai ka thënë se në vitin 2009, ka pasur kontratë me MASHT për mbikëqyrje të objekteve.

“Gjatë vitit 2009, si kompani, kanë mbikëqyrur edhe punët e operatorit ekonomik ” Ndërtimtari”. Në atë kohë ka filluar ndërtimi dhe është punuar sipas kontratës. Ngecje ka pasur, në fillim ka qenë aspekti financiar , nuk ka pasur qeveria buxhet”, ka thënë ai.

Ndryshe, ky gjykim fillimisht është konstatuar se do të shtyhet për shkak se i akuzuari Mustafa nuk është paraqitur në gjykatore.

Gjykimi ka filluar në orën 9:30, e ai për rreth 20 minuta nuk është paraqitur në sallën e gjykimit.

Sipas aktakuzës së ngritur më 19 dhjetor 2016, Musa Shala si person zyrtar në mënyrë të drejtpërdrejt ka kërkuar dhe pranuar përfitim në kundërshtim me detyrën e tij zyrtare. Ai akuzohet se ka kërkuar nga Nysret Berisha pesë mijë euro të cilat i ka pranuar në lokalin “Albana”. Ndër tjera, sipas aktakuzës, ai ka nënshkruar situacionin e dytë në vlerë prej 155,202.04 euro sipas raportit të pagesës.

Me këtë, ai  konsiderohet se ka kryer veprën penale “marrje ryshfeti” nga neni 343 paragrafi 1 i KPRK-së.

Aktakuza e ngarkon Musa Shalën edhe me veprën penale keqpërdorim të pozitës zyrtare .

Sipas aktakuzës, ai si zyrtar i inspektimit të projekteve , përkatësisht projekt-menaxher në MASHT, në dosjen e tenderit për punë në vlerë të madhe , përgatitur më 14 gusht 2009 me titull Ndërtimi i objektit të shkollës së mesme, pas lidhjes së kontratës mes autoritetit kontraktues përfaqësuar nga Xhemajl Buzuku dhe operatori ekonomik  “Ndërtimtari” SH.P.K, përfaqësuar nga Avni Mustafa më 9 tetor 2009 në vlerë prej 2.226.064.30 euro dhe pasi që operatori ekonomik “Ndërtimtari” me bashkëpronarët Avni Mustafa dhe Mustaf Mustafa , i cili si porositës e ka përfaqësuar kontratën, garantuar nga Rafet Ibishi, e të cilët e kanë fituar këtë tender me çmimin e përmendur, operatori ekonomik “ Ndërtimtari” më 14 shkurt 2011 ka nën kontraktuar me “Con Inga” sh.p.k , pronë e bashkëpronarëve Nysret Berisha dhe tani të ndjerit Naser Preniqi.

I cili thuhet se  si zbatues i punimeve ka përfaqësuar kontratën duke lidhur kontratën për ndërtim në shumë prej 1.384.689.50 euro me të cilën kontratë veç tjerash  është parashikuar që përfundimi i këtij projekti do të bëhet brenda 150 ditëve të punës nga dita e fillimit të punimeve për çdo fature lidhur me punët  kryera në objekt, në vlerë prej 110 mijë euro pagesa do të bëhet në shumë prej 100 mijë euro pa llogaritur 10% që do të ndalet nga pagesa e çdo fature.

Për çka thuhet se ka qenë në dijeni Musa Shala, por me dashje për këtë nuk e ka njoftuar fare autoritetin kontraktues ndonëse operatori ekonomik ka vepruar në kundërshtim me dy akte juridike nenin 30 të Ligjit nr.04/l-042 i ndryshuar dhe plotësuar me ligjet nr 04/L-237, 05/L-068 dhe nr.05/L-092 që ka parashikuar se tenderuesi ka dasht të tregoj në tenderin e tij që ka pë qëllim të nën kontraktoj palët e treta.

Në vijim thuhet se rrjedhimisht ka vepruar në kundërshtim edhe me Udhëzuesin Operativ për Prokurim Publik të KRRPP të janarit 2012 k në pikën 17 titulluar Dosja e tenderit, nënpika 17.13 është paraparë që autoriteti kontraktues të deklarojë në dosjen e tenderit që operatorët ekonomik duhet të tregojnë në tenderin e tyre çdo pjesë të kontratës që operatorët ekonomik kanë për qëllim të nën kontraktoj te palët e treta dhe se nën kontraktimi nuk bën të kalojë 40% ë vlerës totale të kontratës, si ka ndodhur në rastin konkret.

Ndërsa, i akuzuari Mustafë Mustafa, sipas aktakuzës, në cilësinë e bashkëpronarit dhe përfaqësuesit ligjor të kompanisë ndërtimore “Ndërtimtari” ka keqpërdorur pozitën e tij.

Ai sipas aktakuzës, në emër të kësaj kompanie ka lidhur kontratë me autoritetin kontraktues në vlerë prej 2,226,063.20 euro, e më pas ka lidhur kontratë ndërtimi me të njëjtin autoritet kontraktues me çmim kontraktues tjetër, në vlerë prej 1.384,689,50 euro, duke nën kontraktuar mbi vlerën 40% të vlerës totale të kontratës, gjë që është në kundërshtim me dispozitat ligjore. /Betimipërdrejtësi