Vdes mamia llapjane Sanije Topanica, iu ndihmoi grave në lindje gjatë luftës
Garë e fortë në LDK për kandidatin për kryetar të Prishtinës. Ja kandidatët potencial!
Derisa kanë mbetur edhe pak muaj deri në mbajtjen e zgjedhjeve lokale, në LDK është ashpërsuar gara për kandidatin e mundshëm për kryetar ta Prishtinës, shkruan Gazeta Blic.
Gazeta Blic nga burime të saja ka marrë vesh se deri më tani janë tre kandidatë më serioz për t’u nominuar nga LDK për të parin e kryeqytetit.
Sipas këtyre burimeve, zëdhënësi i Qeverisë, Arban Abrashi dhe këshilltari i Isa Mustafës, Sokol Havolli sot për sot janë ndër kandidatët më serioz për t’u nominuar për kryetar të Prishtinës, nga partia e Isa Mustafës.
“Gara është shumë e fortë. Pos tyre, edhe Ismet Beqiri ka shfaqur ambicie për t’u rikthyer edhe njëherë në krye të Prishtinës, mirëpo që duket se nuk ka mbështetje shumë të madhe nga lideri i partisë, Isa Mustafa. I pari i partisë më me simpati e sheh Arban Abrashin e Sokol Havollin, se sa Ismet Beqirin”, tha ky burim.
Megjithatë, shton ky burim se LDK e Isa Mustafa ende nuk e kanë portretizuar kandidatin më serioz për kryetar të Prishtinës, që do të mund ta sfidonte Shpend Ahmetin.
Në anën tjetër, nga LDK zyrtarisht thonë se ende nuk e kanë zgjedhur kandidatin që do ta qesin për kryetar të Prishtinës, në zgjedhjet lokale që do të mbahen gjatë vjeshtës.
Nënkryetari Lutfi Haziri i ka thënë shkurt Gazetës Blic se ende nuk kanë vendosur për emrin e kandidatit.
“Jo, ende nuk e kemi zgjedhur”, tha Haziri për Gazetën Blic.
Në anën tjetër, deputeti i LDK-së, Aem Salihaj i kontaktuar për këtë temë, tha se për këtë çështje duhet të kontaktohet kryesia e partisë.
As këshilltari i kryeministrit, Bajram Gecaj nuk ka pranuar të flas për këtë çështje me arsyetimin se për këtë vendosin strukturat qendrore të LDK-së dhe ai nuk është pjesë e tyre.
Ndryshe, LDK më 2013, për herë të parë e kishte humb kryeqytetin, që kishte qeverisur nga paslufta.
Ishte Shpend Ahmeti nga VV, ai i cili kishte arritur që në zgjedhjet e fundit lokale të mposhtë në raundin e dytë, Isa Mustafën, duke bërë që kështu përfundimisht të thyhet ky bastion i LDK-SË.
